Prome Minister Evelyn Wever-Croes
*Pa purba na haya ayudo pa cu e retonan cu Aruba ta enfrentando cu RWZI
ORANJESTAD (AAN): Prome Minister Evelyn Wever-Croes hunto cu Minister Ursell Arends a biaha pa New York pa atende e conferencia di awa na Nacionnan Uni, organisa pa Reino Hulandes y e pais Tajikistan. E conferencia aki ta sumamente importante, mirando cu awa ta primordial den bida di cada ciudadano y hunto cu turismo ta e pilarnan economico di pais Aruba.
Alcontrario di hopi paisnan grandi y esnan cerca, Aruba ta bendiciona di tin un planta na WEB, cu ta provee un calidad halto di awa pa bebe y cu ta accesibel na tur ciudadano. Esaki sigur ta algo di aprecia, na momento cu ta tende con e otro paisnan, specialmente esnan cerca ta expresa nan limitacion pa cu provision di awa na nan pais.
Un di e retonan grandi cu Aruba ta enfrentando pa cu awa ta Rioolwaterzuiveringsinstallatie (RWZI). Actualmente, Gobierno ta trahando pa privatisa e departamento aki, pa asina amplia e capacidad. E planta aki a wordo construi hopi aña pasa ora cu e populacion di Aruba y su bishitantenan tabata hopi menos. Esaki ta un punto cu Prome Minister a trece dilanti na e conferencia, pa wak con por haya ayudo di Nacionnan Uni pa cu esaki.
Aruba ta promoviendo agricultura, pero pa esaki provision di awa tambe ta necesario. Esaki ta otro reto cu Prome Minister a trece dilanti durante e conferencia. Ta hopi importante pa subraya cu Aruba ta un pais chikito, cu ta sufri e consecuencia di mal maneho di paisnan grandi.
Pesey ta importante pa e paisnan grandi cuminsa tene na cuenta cu awa ta un derecho di e ciudadanonan. Si nan no haci esaki, e paisnan chikito ta core e riesgo cu awa enbes di ta un bendicion ta cuminsa causa tragedia.
Pa e motibonan menciona, participacion na e conferencianan di Nacionnan Uni ta sumamente importante. E reunionnan aki ta duna e paisnan chikito manera Aruba e oportunidad di resona nan voz pa asina e grandinan por scucha y compromete nan mes.
Tambe e conferencianan aki ta yuda pa e paisnan siña di otro y alabes comparti e storianan y exito cu cada un tin.
Apart di e reunionnan aki, diamars mainta, Prome Minister a fungi como presidente di ex officio, na unda su persona mester a dirigi e conferencia y como tal duna un declaracion den nomber di Reino Hulandes completo di e situacion di awa y kico ta e compromiso pa cu esaki.
Prome Minister ta sumamente satisfecho cu e reunionnan ta bayendo bon. Aruba ta hayando renombre, pa cu e maneho responsabel cu e pais ta hibando y pa pone e ser humano central. Gobierno di Aruba ta comprometi pa sigui traha duro pa henter e comunidad por ta orguyoso di ta parti di pais Aruba.
