Jeanine Tromp, Gender Consulent
ORANJESTAD (AAN): Dia Internacional di Hende Homber, celebra riba 19 di november, ta un dia pa honra e contribucion positvo di hende homber na famia, comunidad y sosiedad. E dia aki ta stimula igualdad di genero, salud mental y físico, y ta inspira hende homber pa ta bon ehempel den bida di tur dia.
Señora Jeanine Tromp, Gender Consulent di Centro di Desaroyo di Hende Muhe (Cedehm) den entrevista cu DIARIO a conta riba e charla organisa pa Cedehm en conexion cu e dia special aki. Esaki lo tuma luga dia 12 di November, di 7:00 pa 9:00 PM na MFA Santa Cruz. Topiconan di e charla lo ta riba salud di hende homber, andropausa, y uzo di alcohol y droga entre otro.
Señora Tromp a remarca cu apesar cu Cedehm ta un centro pa desaroyo di hende muhe, tur aña e centro ta organisa algo pa hende homber. “Ta hopi importante pa hende hombernan tambe haya ayudo door di scucha nan y tambe door di duna nan tips y hermentnan cu nan mes por uza”, señora Tromp a expresa.
Segun señora Tromp, tin varios factor cu ta hunga un rol cu ta causa preocupacion. Pa e grupo di hoben, hopi biaha e abuso di droga y alcohol ta hunga un rol mientras cu di parti di adultonan, edad ta hunga un rol. Ambos ta partinan cu tin mester di ayudo sigur.
Ta invita tur hende homber pa participa na e charla. Mester registra via pagina di facebook di Cedehm of via nan telefoon number 5881391. E charla ta hopi interesante y gratis.
