ORANJESTAD (AAN): Guardian Group Charitable Foundation a compromete pa haci un donacion di USD 312.000 pa
yuda cu esfuersonan di reconstruccion y restauracion na Jamaica despues di e daño grandi causa pa Horcan Melissa.
E donacion aki ta forma parti di un esfuerso di restauracion coordina y mas amplio nombra “Building a Better Jamaica Fund”, dirigi pa National Commercial Bank Jamaica Limited (NCB) y administra pa NCB Foundation. Te cu awo, NCB y su socionan a logra recauda al rededor di USD 2.8 miyon pa acelera e restauracion di Jamaica. Esaki ta inclui un prome contribucion di USD 1.25 miyon di NCB mes, suma cu donacion di socionan di hopi aña, y fortifica cu e donacion di USD 312.000 di Guardian Group.
E fondo aki ta destina pa duna yudansa inmediato pa reconstruccion duradero pa e comunidad nan afecta riba e isla. Ehecucion lo tuma luga den colaboracion cu socionan confiabel manera American Friends of Jamaica (AFJ), Food for the Poor Jamaica, UNICEF Jamaica, y Global Empowerment Mission (GEM). E organisacionan aki ta conoci y tin experencia comproba pa garantisa cu e yudansa ta yega na esunnan cu mester dje mas.
Segun Shinelle Grant-Sealey, Vise Presidente di Asuntunan Ambiental, Social y di Gobernacion:
“Como organisacion regional, nos compromiso ta bay mas leu cu simplemente seguro. E ta trata resistencia y restauracion di nos comunidadnan. Nos donacion di USD 312.000 ta un inversion directo den stabilidad pa yuda famia y institutonan cuminsa di nobo. Nos ta para completamente den solidaridad cu NCB Foundation y tur socio den . Ehecucion pa restaura Jamaica.”
Aparte di e contribucion regional aki, Guardian Group a mobilisa tambe apoyo interno pa empleadonan na Jamaica cu a sufri daño. Pa medio di reparticion di paketenan di cuido y sosten continuo, e organisacion ta demostra compasion y compromiso cu su hendenan y e comunidad.
Cu operacion den Trinidad & Tobago, Jamaica, Barbados y e islanan di Caribe Hulandes, Guardian Group ta keda fiel na su mision di duna trankilidad, pas mental y yuda e region den momentonan di necesidad. Di e forma aki hunto ta reconstrui, recupera y bira mas fuerte.
Tocante Guardian Group
Cu un historia rico di mas cu 175 aña, Guardian Holdings Limited ta e compania mama di Guardian Group, un grupo di servicio financiero integra y lider den Caribe. Cu un portofolio amplio cu ta cubri e.o. seguro di bida, salud, propiedad y accidente, pensioen y maneho di capital, Guardian Group ta ofrece solucion financiero completo na individuo, famia y negoshinan den tur etapa di bida.
