ORANJESTAD (AAN): Den un paso importante pa fortalece laso deportivo y educativo den Reino Hulandes, Minister di Relacionnan den Reino,
Educacion, Hubentud, Inovacion, y Deporte di Aruba, mr. Gerlien Croes, a firma un Memorandum di Entendimento (MoU) hunto cu colega Minister di Corsou y colega Diputado di Boneiro cu ta responsabel pa asuntonan di deporte.
E acuerdo ta formalisa e colaboracion permanente entre e tres islanan riba organisacion di e Interinsulaire Schoolsport Spelen, asina yama Weganan Interinsular — un evento anual cu ta uni hobennan deportista di Aruba, Boneiro y Corsou den un ambiente di competencia saludabel, intercambio cultural y formacion personal. Un acuerdo pa uni y crece hunto den deporte.
E MoU ta sigui e Letter of Intent (LOI) cu tabata firma na aña 2022, y ta consolida un marco di cooperacion pa garantisa cu e Weganan Interinsular lo tuma luga anualmente den e prome kwartaal di cada aña.
E meta di e evento ta:
Fomenta intercambio deportivo y educativo entre hobennan;
Promove salud, bienestar y desaroyo di talento;
Y fortalece laso cultural y social entre e islanan.
E weganan lo wordo organisa den un sistema di rotacion entre Aruba, Boneiro y Corsou.
E pais anfitrion lo ta responsabel pa e preparacion y ehecucion di e evento, incluyendo logistica, estadia y seguridad. Pa garantisa coordinacion y transparencia, e MoU ta stipula un comision permanente interinsular, consistiendo di represente di:
IBiSA (Aruba),
FDDK (Corsou),
INDEBON (Boneiro).
E comision lo ta e entidad principal pa coordinacion, supervision y evaluacion di tur edicion di e weganan, cu un rotacion anual di presidencia entre e tres islanan.
E MoU ta tin un duracion inicial di cuater aña (2025–2028) y lo wordo evalua anualmente despues di cada edicion di e weganan. Tambe ta contempla cu otro paisnan of islanan, manera St. Maarten, Saba, Statia of Surinam, por uni den futuro segun esaki wordo aproba pa tur partido inicialmente.
Minister Gerlien Croes a expresa su orguyo y compromiso pa sigui fortalece cooperacion den Reino riba deporte y educacion:
“E Weganan Interisular ta mas cu competencia. Ta un encuentro di cultura, union y inspiracion pa nos hobennan. A traves di deporte, nos ta traha na respet, liderazgo y orguyo pa nos islanan”.
E acuerdo ta simbolisa un paso concreto pa uni e comunidad deportivo caribense den un vision comun: deporte como instrumento pa union, salud y formacion integral.
