Roly Sint Jago, Voorzitter
ORANJESTAD (AAN): Manera a ser treci dilanti diabierna, Minister Geoffrey Wever a introduci Sr. Roly Sint Jago como Presidente di e Bestuur di Aruba Fair Trade Authority (AFTA).
Roly Sint Jago a duna di conoce cu e ta contento di por ta e candidato cu e Comision di Seleccion a propone na minister y na Conseho di Minister.
El a duna di conoce cu el a studia Economia Social na Universidad di Amsterdam y el a bin Aruba bek na aña 1977 y a traha na Asuntonan Economico caminda el e funciona como hefe suplente. Despues di 7 aña den gobierno el a bay den sector priva. Na 1998 pa 2000 e tabata director di finansas di Aruba pa despues bay bek den su consultorio priva.
Sint Jago a sigui bisa cu awo como presidente di e directiva di AFTA, e implementacion di e autoridad aki a drenta su ultimo fase caminda por finalisa tur preparacion cu a ser haci pa incorpora AFTA.
Den e ultimo fase aki, mayormente asuntonan practico tin cu keda regla. Ta intencion pa trata pa na fin di e aña aki, Aruba Fair Trade Authority ta completamente operacional, el a indica.
E fase di implementacion aki a tuma algo mas cu un aña y Minister Wever a haci di AFTA un di su prioridadnan mas grandi. E ley a keda aproba den parlamento di Aruba na juli 2020.
E meta di AFTA ta pa realisa un perspectiva igual pa competencia entre companianan (un level playing field),tambe pa stimula iniciativanan y aumenta oportunidad di sobrevivencia pa entrepreneurnan nobo, a splica. Y pa promove innovacion y di tal forma yuda den diversifica economia, cu na final di dia mester ta na probecho di e consumidornan.
Pero locual mester sosode den e dianan cu ta sigui ta haci e contenido di e ley y e manera di traha di e ley conoci pa medio di sesionnan di informacion y dialogo cu tur stakeholder y cu publico en general, a remarca.
Finalmente, Roly Sint Jago a bisa cu AFTA lo tin investigadonan profesional den su servicio. Arubianonan cu a haya un preparacion specifico riba tereno di competitividad y cu ta economista y hurista cu preparacion universitario.
Den e dianan binidero AFTA ta espera di emplea otro profesionalnan necesario pa yena e cuponan cu falta pa e funcionamento optimal di e autoridad AFTA tuma luga.
El a felicita Minister Wever pa e logro aki di institui AFTA pa Aruba.
