VLISSINGEN: Siman pasa, oficialnan di Aduana na Hulanda a bin descubri como 1.000 kilo di cocaina scondi mey-mey di un cargamento di bacoba.
E pakinan di cocaina a wordo intercepta durante un control di autoridad. En total nan a haya 1.002 paki di droga, y esaki a socede den waf di Vlissingen cu ta situa den parti mas zuidwest di Hulanda.
Polis y Marechaussee Real a sostene Douane den vigilancia y mantene e area di waf liber durante e operacion. E droga aki cu un balor calcula di como 75 miyon Euro riba caya, a wordo scondi posiblemente na Ecuador. E cargamento di bacoba tabata destina pa un compania na Hulanda. E compania aki posiblemente tin nada di haber cu e contrtabando aki.
Mientras tanto e droga a wordo destrui caba door di Team Bijzondere Bijstand di Douane. Polis di Waf a detene un sospechoso, y a sigui cu e investigacion rond di e caso aki.
