Ta inaceptabel pa ignora e situacion di Parkietenbos

Minister Dowers

*Trabaonan di saneamento di Dump lo inicia e aña aki 

ORANJESTAD (AAN): Recientemente, Minister di Husticia, Integracion, Transporte Publico y Energia, mr. drs. Arthur Dowers, a ricibi e resultado di estudionan tecnico haci door di Witteveen & Bos riba e situacion di dump di Parkietenbos. E investigacion ta confirma cu tin tres punto di prioridad cu ta rekeri atencion inmediato y structural.

E prome punto di preocupacion ta e inclinacion na parti zuid di dump cu ta pega na lama y cu ta demasiado halto. Como consecuencia di esaki, desperdicio ta bay den lama, creando un riesgo ambiental serio y un situacion cu no por sigui ignora. E situacion aki ta rekeri intervencion tecnico urgente pa preveni mas daño y pa proteha e ecosistema den e area.

E di dos punto ta e fenomeno di asina yama “smouldering waste”, caminda desperdicio, aunke no tin candela visibel, ta kima bao tera durante tempo largo. Actualmente tin 16 area identifica cu e situacion aki y ocasionalmente e sushi riba tera por pega candela, causando molester grandi na e habitantenan di e bario. E problema aki no solamente ta crea molester pa e habitantenan, sino ta representa un riesgo pa salubridad publico y siguridad.

E tercer punto di preocupacion ta e deposito di asbest riba e tereno. E material aki ta rekeri un maneho specialisa y costoso pa garantisa cu ta keda seya y controla sin forma riesgo pa medio ambiente ni pa salud publico. Mester di un plan serio y tecnico pa maneha e situacion di manera responsabel.

Pa Minister Dowers, ta inacceptabel pa ignora e situacion di Parkietenbos. Gobierno ta exigi accion structural y responsabel. Gobierno tin un responsabilidad cu nos comunidad y cu futuro generacionnan y lo tuma accion duradero pa e dump.

Den su vision pa e futuro di e area, Minister Dowers ta contempla un transformacion completo di e dump den un area cu mata nativo. E plan ta enfoca riba saneamento di e tereno, rehabilitacion ambiental y mehora e estetica di e area. Un area natural lo no solamente elimina e molester cu a afecta e bario durante hopi aña, pero tambe lo crea un espacio berde cu por contribui na bienestar general.

Responsabilidad ambiental y sostenibilidad ta central den tur decision di Gabinete AVP-Futuro. Tin situacionnan dificil cu ta rekeri inversion, planificacion y determinacion, pero gobierno ta traha riba solucionnan structural cu ta beneficia nos comunidad y futuro generacionnan. Ta tempo pa trata e problema di Parkietenbos cu seriedad, vision y accion concreto.