Parlamentario di AVP, Stephany Sevinger:
ORANJESTAD (AAN): Un biaha mas Ministerio Publico ta den boca di pueblo. Ayeramainta, den e caso di morto di e hoben Ayden Lanoy cu keto bay ta move hopi emocion den comunidad, fiscal a pidi un castigo di 12 luna di prison condicional y 180 ora di trabou comunitario pa e dos agente policial envolvi.
Aunke awe e no por tabata presente na Corte pa motibo di reunion Tripartiet tumando luga, Parlamentario di AVP, Stephany Sevinger ta sigui tur desaroyo rond di e caso for di e prome dia. E ta indica cu “como representante di pueblo, mi responsabilidad ta pa vigila cu husticia ta maneha cu transparencia y di manera husto.”
Segun Sevinger, e caso di Ayden Lanoy ta uno den cual un famia a sufri e perdida di nan ser keri na un manera asina inhusto, cu ta dificil pa papia di un castigo cu por ta suficiente. “Ningun condena lo por cambia e dolor ni compensa e perdida. Pero loke si pueblo ta spera, ta un proceso y un resultado cu ta refleha gravedad di loke a sosode.”
E parlamentario a mustra preocupacion riba loke e ta yama un discrepancia grandi den e manera cu algun caso ta wordo trata den nos sistema di husticia. “Mi no sa cu ki linial dobla Ministerio Publico ta midi cu ne, pero ta cla cu pueblo ta sinti cu no semper tin consistencia den e decisionnan cu ta wordo tuma.”
Sevinger a agrega cu cada caso tin su propio circunstancia, pero cu sistema di husticia mester ta percibi como independiente, consistente y husto. “Pueblo ta cansa di mira cu castigonan ta wordo percibi diferente manera dependiendo di ken ta esun cu ta para dilanti di hues. Confianza den nos sistema hudicial ta fundamental.”
E parlamentario a conclui reafirmando cu e lo continua sigui e caso di cerca y otro desaroyonan relaciona cu nos sistema di husticia, cu meta pa garantisa transparencia, responsabilidad y un trato husto pa tur ciudadano.
