ORANJESTAD (AAN): Presidente di SER (Sociaal Economische Raad) señora Tisa LaSorte a reuni cu Gobernador Alfonso Boekhoudt.
Raad di SER ta e conseho cu tin participacion den representante di sector priva, di gobierno y di sindicato, y como conseho a crea un lista di preocupacion y prioridadnan cu Gobierno nobo mester atende.
Segun señora LaSorte, awo cu eleccion a pasa ta importante pa tin un bon proceso di formacion pa asina por yega na un Gobierno, cu lo tuma nan responsabilidad na serio y cu ta bay atende cu asuntonan serio cu Aruba ta enfrenta, incluyendo asuntonan cu ta den Landspakket. Nan tin un lista di reforma cu mester di atencion y nan ta premira cu ta bay tin un Gobierno serio cu ta bay atende cu nan.
Rol di SER aworaki ta pa duna nan conseho riba kico ta e prioridadnan, como tambe e trabaonan cu Gobierno nobo mester atende cune. Nan ta keda como organo cu ta duna conseho riba topiconan social-economico pa tur Gobierno. Nan tey den caso si un Minister mester di conseho riba un decision cu e ta purbando di tuma of si conseho mes di SER ta dicidi riba un topico cu nan ta haya mester di atencion di Gobierno, pa asina duna nan conseho.
Señora LaSorte a indica cu pa loke ta trata e reformanan, mayoria di esaki ta poni den Landspakket caba, pero hopi di nan ainda falta haya definicion y esey ta hopi importante. Gobierno mester sa con pa defini e diferente topico cu tin den e reforma y tambe traha cu Hulanda pa yega na un bon reforma pa e diferente sectornan, manera educacion, cuido, economia, finanzas publico y aparato gubernamental mes. E trabao y retonan ta hopi.
Cu un Gobierno responsable, cu ta tuma e trabao serio y cu ta compronde cu e reformanan aki ta reformanan cu mester atende cune y ehecuta nan den su debido tempo, e ora Pueblo por keda trankil y no tin nada di preocupa. Su mensahe ta cu e tipo di reformanan aki ta pa bienestar di Aruba den futuro, pero e ta un proceso dificil si pa yega na esey. Señora LaSorte a enfatiza cu "na final e resultado y intencion di tur reforma ta pa bienestar di nos pais".
