"Ta importante pa realisa cu nos coralnan no ta den un bon estado"

Sietske van der Wal di FPNA: *'Stony Coral Tissue Loss Disease' ta causando cu e coralnan ta muri

ORANJESTAD (AAN):  Sietske van der Wal, kende ta Conservation Education Manager na Fundacion Parke Nacional Aruba (FPNA), a papia cu coralnan ta hayando malesa.

            El a bisa cu a duna diferente charla informativo tocante e malesa di coral. Ta importante pa realisa cu e coralnan no ta den un bon estado. Ya caba nan no ta mucho bon di salud pasobra tin hopi contaminacion den lama y hopi presion riba e coralnan y riba dje ta bin e malesanan.

            Segun Van der Wal, mescos cu hende tin griep, por ehempel, ta normal pa tin presencia di malesa den e coralnan. E coralnan ta animalnan, dus nan tambe por haya un malesa. E malesanan normalmente ta mustra un presencia di 2 pa 3 porciento den ful e poblacion bao di lama riba e rifnan.

            El a sigui bisa cu aworaki tin un malesa cu ta pasando den Caribe, den e region, y tin un gran chens cu el a yega Aruba tambe y esaki yama Stony Coral Tissue Loss Disease' y cu ta afecta un porcentahe hopi mas halto di e coralnan.

            Pa cierto especienan, entre 8 pa 10, e por afecta di 66 pa 100 porciento di e poblacion cu por muri door di e malesa aki. Pesey e ta algo hopi severo. Banda di esey ainda tin 30 especie mas cu por wordo afecta cu e malesa pero den un manera un tiki mas leve, a splica.

            E malesa locual ta mira di dje ta cu e coralnan ta bira malo y e prome sintoma di esey ta cu nan ta perde nan color. Ora un coral sinti malo, e prome cos cu nan ta perde ta e alganan. Nan ta bay, nan ta disparce. Den e caso di 'Stony Coral Tissue Loss Disease', nan ta perde e poliponan cu ta contene e alganan y e skelet so ta keda atras, a indica.

            Van der Wal a agrega cu esey ta e prome sintoma, cu e coral ta bira blanco y un coral grandi, di un meter, lo por muri den un luna door di e malesa aki.