Franklin Hoevertsz tin 100 miyon motibo pa ta envidioso

Partido MEP ta convenci

• E ta critica cu conferencia tabata ‘cera’ pero e tambe a haci algo similar
• Conferencianan anterior organiza pa Hoevertsz tabata yen promesa falso 

ORANJESTAD (AAN): Si bo pensa esaki bon, berdad Franklin Hoevertsz tin 100 MIYON motibo pa ta envidioso.   El a yega di organiza cantidad di conferencia, sin logra nada. Gobierno actual ta organiza 1 conferencia y logra un fondo di 100 miyon euro

   Den un bolein emiti pa Partido MEP, nan a bisa di a tuma nota di critica pisa di ex director di Utilities Franklyn Hoevertsz, den direccion di Prome Minister Evelyn Wever-Croes, y Minister Glenbert Croes.

   Den un atake hopi infantil, sr. Hoevertsz a cuestiona e prome conferencia di clima y energia. Hoeverts a trece diferente argumento padilanti, djis pa kibra e exito di e conferencia.

   Entre otro a cuestiona cu e conferencia no tabata habri pa tur hende, siendo cu esey ta algo usual ora bo ta organiza un conferencia ministerial. Un conferencia riba nivel di ministernan tin su protocol, y Hulanda ta hopi estricto den esaki. Asina mes Gobierno di Aruba a incorpora segmentonan cu a invita studiantenan di Colegio EPI, y otro stakeholders. Tambe a transmiti e ultimo dia ‘live’.

   Partido MEP no ta bay den detaye di tur e criticanan, pasobra por nota cu nan ta basa riba envidia. Y ta comprendible, pasobra sr. Hoevertsz a organiza un cantidad di conferencia (por cierto sin invita comunidad di Aruba mes), mas ainda, sin logra nada. Puro promesanan falso cu a costa pueblo di Aruba miyones di Florin.

   Di otro banda, e Gobierno actual, Gabinete Wever-Croes, ta organiza 1 conferencia y logra un fondo di 100 miyon euro. E fondo aki ta destina pa alivia e peso di ciudadanonan di pais Aruba, y lo bay completamente na e ciudadanonan di Aruba, Curaçao y St. Maarten.

   Ta logico cu sr. Hoevertsz tin pues 100 miyon motibo pa ta envidioso, pasobra e no a logra ni 1 Florin!

   Mester bisa si cu sr. Hoevertsz tin hopi curashi si, despues di a worde retira di Utilities Aruba NV, despues di no por a maneha e compania estatal cu no por a duna dividendo na gobierno, pa sali padilanti y critica e prome y unico conferencia cu realmente ta trece beneficio pa pueblo di Aruba.