Ta importante pa keda haci trabaonan di mantencion di Misa di Paradera pa e no bay mas atras

Pastoor Toti Fuentebella

ORANJESTAD (AAN): Den un entrevista cu DIARIO, Pastoor Toti Fuentebella, Pastoor di Parokia Santa Filomena di Paradera a elabora cu e misa mester di un mantencion pa no bay atras. Ta importante pa keda cuida e edificio, actualmente nan mester drecha bentananan y tin un parti di vloer kibra, specialmente banda di santuario, cu tambe a presenta un leak. Nan tambe mester drecha algun muraya kibra.

Pastoor Toti a reitera cu e aña aki e Parokia di Santa Filomena ta bay celebra 75 aña di existencia y en conexion cu e gran celebracion aki, nan mester haci algun trabao di renobacion di e misa.

Señora Sharine Geerman di Renaissance Convention Center, a wordo acerca pa Comision di Parokia di Paradera pa yuda nan un biaha mas cu e fiesta bailabel. E aña aki e fiesta lo conta cu dos banda, N'Fusion y Robert Jeand'or y su Solo Banda Show, como tambe Metropolis. El a indica cu lo tin basta doorprize.

Manera menciona, e lo tuma lugar dia 11 di Mei, na Renaissance Convention Center, fo'i di 8'or di anochi te cu 2'or di marduga. Pa esnan interesa na cumpra carchi por yama Pastoor Toti of miembronan di Comision di Parokia di Paradera.

Señora Wini Dirkzs, miembro di Comision di Parokia di Misa di Paradera a pidi parokianonan di Paradera, como tambe comunidad completo pa coopera y cumpra carchi pa e fiesta bailabel y asina tambe celebra e 75 aña di Misa di Paradera. E fiesta ta pa un bon causa y alaves disfruta di un tremendo anochi.