Cu continuidad y ampliacion di Praktijk Ondersteurs ta fortifica e prome liña di cuido

Minister di Salud Dangui Oduber:

ORANJESTAD (AAN) – Durante e conferencia di prensa yama pa e Organo Ehecutivo AZV y Stichting Wit Gele Kruis, den ocasion di e firma di contrato pa continuidad di e servicio di POH’s den ns sistema di cuido, Minister di Salud Dangui Oduber, a hiba palabra.

E mandatario a expresa cu e firma di e contrato pa continua cu e servicio di POH, entre su ministerio, AZV y WGK ta fortifica e prome linea di cuido medico na Aruba. “E maneho y vision cu nos tin ta pa mehora e calidad di cuido y servicio, percura pa nos haci inversionnan continuo den cuido medico pa asina nos por garantiza cu e fondonan di AZV ta keda sostenible y cu nos por keda ofrece e mesun pakete di seguro cu ta hopi amplio pa nos aseguradonan. Prevencion di salud tambe ta un enfoke principal den e maneho cu nos ta hibando. Nos tin varios proyecto cu ta den ehecucion cu ta hopi exitoso ta ‘Healthy Lifestyle Center’ unda nos ta duna guia na tur persona cu tin necesidad pa cambia nan estilo di bida”, Oduber a señala.

Recientemente, e centro aki a celebra un aña di existencia na unda tin 300 cliente caba, cu ta participando activamente den dje.

Aña pasa den Luna di Juni, a firma un acuerdo unda cu pa prome biaha den historia, pais Aruba tin un “Zorg Accord” entre tur e stakeholders, tur e actornan den cuido medico na Aruba, pa nan por determina hunto e direccion di e futuro di cuido medico na nos Isla.

“Nos ta kere, sigur como Ministerio cu ta hopi importante pa duna input na tur e stakeholders den cuido medico, scucha nan, duna nan oido y participacion pa asina hunto na e miho resultadonan cu nos por yega na dje pa nos comunidad”, Minister di Salud a expresa.

“Un di e temanan den e acuerdo aki tabata e fortificacion di e prome liña di cuido y di e forma aki nos a determina metanan pa e siguiente tres añanan nos dilanti, di 2024 pa 2027, y un di e metanan importante ta pa nos reinforza y fortifica e prome liña di cuido. Di e forma aki nos ta bay aumenta e cantidad di docternan di cas p’asina baha e cantidad di aseguradonan di cada docter di cas, nos ta bay crea mas cupo di estudio di docter di cas na ImSan, y Huis Arts opleiding, y tambe awe nos firma e acuerdo pa amplia e cantidad di POH’s na docter di cas cu diez extra y asina baha e presion cu tin na docternan di cas y ofrece tambe un miho servicio na nos aseguradonan y nos ta bay haci inversion den formacion di Asistentenan di Docter di Cas”, e dignatario a duna di conoce.