Ta importante pa e adultonan mayor ta activo den sociedad y pa conoce contactonan nobo

Rosa Leon, coordinador di Proyecto Grandi Hunto Hunto Grandi:

ORANJESTAD (AAN) – Manera ta conoci “Grandi Hunto, Hunto Grandi” a sera siman cu a pasa cu un evento na unda otro grupo di adulto mayor a encarga cu cushina pa prepara un tremendo menu pa nan.

Den un entrevista cu DIARIO, Rosa Leon, coordinador, a duna di conoce cu Grandi Hunto Hunto Grandi, tin un programa unda e grandinan ta bay den barionan pa conoce otro hendenan, asina nan a bishita Noord, Santa Cruz, Savaneta, unda cu esnan cu a meld a haya e oportunidad di presencia e programa aki.

            “Esaki ta importante pasobra manera bo ta bira grandi, bo contactonan ta keda baha, e personanan ta keda fayece y ta importante pa crea contactonan nobo, unda ora un bay bo tin un otro persona pa conoce y tin contacto cu ne, y na diferente bario tambe”, Rosa Leon a señala.

            Leon a splica cu e demanda ta grandi pa e actividad aki, pero e transporte ta dificil. E biaha aki nan tabata den Centro di Bario Brasil, pero pa falta di transporte varios di e grandinan no por a yega.

“Plan pa futuro tin hopi, pero prome cu tur cos ta trece concientizacion cerca e adulto mayor, con pa e ta un adulto mayor sano, pero tambe riba e importancia di ta activo den sociedad, den tur manera cu bo ta pensa ta importante pa ta activo den sociedad”, Rosa Leon a señala.

            Aworaki nan ta traha cu un plan di cuater aña cu tabata un necesidad, por ehemplo di cana den naturaleza. Pero tur aña e necesidad ta cambia y aworaki, nan ta kere cu pa nan brinda un miho servicio mester bay na e adulto mayor atrobe y sinta cu nan, puntra kico ta e cambionan cu mester pa nan ta mas activo. Importante ta cu di e gruponan aki, e boluntarionan ta 70 plus y nan ta compronde otro miho. “Manera mi ta bisa, cantidad no ta calidad, por ta un grupo di diez pero unda bo ta ofrece e servicio cu bosonan tur mester cu otro, y e proyecto ‘Hunto Grandi Grandi Hunto’ ta yuda den esaki. Nos tin dos miembro cu ta duna un great sosten durante full e aña pa creatividad. Con pa pidi financiamento ta hopi importante, y den esaki CedeAruba ta un organo basta esencial”, Rosa Leon a señala y gradici.