ORANJESTAD (AAN): Manera ta conoci Ley di Plan di Mayor: (LV Voortgezet Ouderschap en Zorgvuldige Scheidingen) a drenta na vigor dia 1 di Maart 2024.
E Ley aki ta basa riba e derecho cu un mucha tin pa worde cria door di ambos di su mayornan apesar di un separacion. Mayornan cu divorcia/separa tin e obligacion di traha un Plan di Mayor caminda nan mester stipula con nan ta bay comparti e responsabilidadnan pa cu nan yiunan. Tambe e ley ta pone enfasis riba articulo 12 di tratado internacional di derechonan di mucha, cual ta cu e mucha mester tin un bos den asuntonan cu ta regard’e.
Den cuadro di preparacionnan pa cu introduccion di e ley aki. Plan di Mayor a haya fondonan for di Ministerio di Husticia di Hulanda Jeugd Criminaliteit Preventie Fonds pa asina por cubri entre otro estudionan extenso pa midi e necesidad di e ley y su intervencionnan, y tambe pa midi e efectividad di e intervencionnan.
Michella Steenvoorde-Lacle kende ta e palanca tras di Plan di Mayor, a coördina un onderzoekovereenkomst entre Universidad di Aruba y Universidad di Utrecht pa asina haci estudionan rond di e tema.
E pregunta en cuestion ta: Con nos hobennan y nan mayornan ta funciona despues di un separacion, y con leu nos por wak cambionan entre e situacion prome cu e ley y despues cu e ley pa bin cu Plan di Mayor obligatorio, y con efectivo un trayecto di mediacion ta den mitiga e problemanan rond di e separacion?
Pa por contesta e pregunta aki, nos a parti’e den 4 categoria:
(A) Con un hoben ta funciona despues di un separacion den termino manera e.o. salud mental, funcionamento na scol, comportacion delincuente, contacto hoben y mayor, criansa di e mayornan y e relacion entre e hoben y e mayor?
(B) Tin un diferencia entre e funcionalidad di hobennan despues di un separacion, prome y despues di introduccion di Ley Plan di Mayor?
(C) Nos por guia e hoben y nan mayornan pa mitiga efectonan negativo di un separacion door di ofrece nan un trayecto di intervencion defini?
(D) E parti administrativo: cuanto caso ta worde lanta na corte pa divorcio, custodia comparti, alimentacion, luga di biba, areglo di bishita, cuanto covenant/plan di mayor a worde entrega, cuanto mucha a haya audiencia cerca e huez?
Pa contesta Seccion A: Plan di Mayor a haci encuesta “Nos Hoben y Su Bida Familiar na 13 scol secundario na Aruba. Y lo ripiti e encuesta aki den 2 aña.
Pa contesta Seccion D: Plan di Mayor a haya permiso for di Corte di Prome Instancia pa analisa e casonan di e añanan 2020/2021/2022/2023 y 2024 te cu februari prome cu introduccion di Ley Plan di Mayor.
Michella ta splica cu Plan di Mayor Aruba ta hopi satisfecho cu nos a colecta e data, y awor e data lo worde analisa door di e team di dr. Luc Alofs di Universidad di Aruba y dr. Inge van der Valk di Universidad di Utrecht.
Mayornan cu ta atravesando un divorcio of separacion por acudi na Loket Plan di Mayor pa un intervencion gratis. E prome stap ta pa yena un formulario di inscripcion riba e website cu ta www.plandimayor.org, una vez cu ambos mayor yena esaki. Plan di Mayor ta invita nan pa un intake y lo recomenda cual intervencion ta pas pa nan situacion.
Plan di Mayor ta situa na MFA Santa Cruz.
