Natalie Maduro, directora di LVV:
*Santa Rosa lo percura pa tin esaki pa e piernan cu ta bay drecha
ORANJESTAD (AAN) – Nathalie Maduro, directora di Departamento di Agricultura, Cria y Pesca (LVV-Santa Rosa), a comenta den entrevista cu DIARIO, cu ora di drecha un pier of cualkier otro proyecto cu por tin, ta importante pa tin un plan di mantencion, conhuntamente cu e contract cu wordo cera.
“Specialmente den nos caso, caminda cu tin e parti unda por wak cu lama ta basta fuerte. Dus e piernan mester nan mantencion, pero no solamente e pier pero full e omgeving band’i dje. Pa e parti ey sigur, e piernan cu nos ta bay traha riba dje, nos ta bay zorg pa tin un plan di mantencion cu ne, cu lo por cay tambe bao di Santa Rosa, cu nos por haya e fondonan necesario pa zorg pa e piernan wordo mantene debidamente”, Nathalie Maduro a señala.
El a comenta tambe cu hopi hende ta pensa cu pa ta piscado mi mester tin un boto. “Y esey tur biaha nos ta bisa no, p’esey bo tin piernan. Enberdad botonan ta complementa e piernan pero bo por siña un mucha pisca for di e pier. Bo por haci uso di un pier si bo kier relax, si bo kier eventualmente desconecta; piernan ta crea habitat. Hopi biaha si bo bay snorkel, bo ta wak cuanto pisca ta biba rond di un pier, pues nos ta spera cu nos por logra, eventualmente, drecha e piernan cu ta mas importante pa piscado.
Nos tin un bon samenwerking caba cu Fundacion Centro di Pesca Hadicurari, y nan tambe di nan banda, nan ta haci hopi mantencion di e piernan cu nan a construi, y den nan caso mi sa cu un di nan deseonan ta, pa oficialmente nan haya e piernan cu nan a construi, bao na beheer. Pero, mientras tanto, mi ta wak cu tin hopi interes bek.
Prijs di cuminda ta sigui subi manera nos tin añanan ta bisando, y nos ta biba riba un isla caminda tur hende ta gusta pisca, y pakico no duna nan e facilidad necesario pa nan por eherce nan ofishi di piscamento”, Nathalie Maduro a señala.
