Cinthia Quant, Program Manager:
ORANJESTAD (AAN)—Cinthia Quant, Program Manager di Fundacion Contra Violencia Relacional (FCVR), den entrevista cu DIARIO a menciona cu e fundacion tin clientenan residencial y no residencial.
Mayoria di clientenan ta residencial y ta hende muher. Y mayoria ta bin cu nan yiunan. E servicio aki di maneho di caso ta habri tanto pa hende muher como hende homber. Tin algun caso di hende homber, pero e mayoria cu ta yega ta hende muher, Quant a reitera.
“No necesariamente pasobra tin violencia cerca hende homber, sino cu eyfo tin hende homber buscando ayudo, y pesey nos ta purba colabora cu diferente instancia y companianan pa por minimiza e mitonan rond di violencia di hende homber y cu nan tin miedo di busca apoyo”, Quant a splica.
El a reitera cu FCVR ta brinda hende homber e servicio di maneho di caso, y mayoria di e casonan cu ta yegando pa e servicio aki ta for di edad di 30 bay ariba. “E dificultadnan pa resolve ta e housing, estadia of un dak. Esey ta un di e causanan mas grandi y un di e motibonan pa cual ta keda den violencia, pasobra no tin caminda di bay, e aspecto financiero ta dificil, pues esey ta loke nos ta mirando”, Cinthia Quant a señala.
El a reitera cu di aña pasa pa aworaki, loke nan a wak ta cu den full un aña ta mirando te na mitad di e aña aki caba, loke ta indica cu violencia keto bay ta existi y no tin duda.
El a señala cu aworaki cu e fundacion a pasa den cambionan tanto den nomber como den strategia, e ta bolbiendo na crea e confianza di comunidad y hendenan ta yegando cerca FCVR, y e tin hopi peticion pa tayernan di trabao y charla.
