Trahado preventivo di FADA Rulienne Arends:
*Den paisnan grandi tin usadornan jong cu problema di pulmon caba!
ORANJESTAD (AAN) — Den entrevista cu DIARIO, e Trahador Preventivo di Fundacion Anti Droga Aruba, Rulienne Arends, a elabora tocante e tema di vaping, cu ta hala hopi atencion pero cu ta un desaroyo alarmante.
Vaping ta un producto cu enberdad ta smak y ta hole dushi, pero cu strategicamente algun aña atras, prome cu el a bira hopi popular, nan tabata uz’e den companianan grandi, por ehemplo na Merca, pa nan por a bende nan producto.
Pues, nan a busca un grupo cu cual por a bende nan producto, y nan a target un grupo cu ta biba hopi e avance di tecnologia, y cu kier a bin cu otro forma di huma cu ta un tiki mas moderno.
Un compania cu tabata tin un marca hopi popular na Merca a mercadea e producto electronico aki, como uno mas moderno, nobo cu su holo y smak ta dushi, y nan a gara e grupo di hoben, esnan cu ta lantando den loke ta tecnologia, y eynan a cuminza.
Nan propaganda tabata bisa cu ora e persona sali cu vaper, e ta mustra hopi saver cu ne. Esaki ta e forma cu nan a propagand’e den escenarionan di salimento, unda e hoben ta pasa den momentonan hopi agradable, cu a haci cu tur hende tabata kier tin e producto aki pa “style”.
Nan no tabata wak e consecuencianan pasobra e tabata smak dushi y tin un holo hopi agradable. Compara cu e cigaria, esaki ta mustra mahos, y pa hopi aña caba tin informacion cu e ta causa cancer, y ta hole stinki.
Pero ya caba por mira den paisnan grandi cu tin hoben usuario di vaping cu problema di pulmon. E vaping ta un trend entre hopi di nos hobennan y nan no ta mira e peligro di esaki. “Tin hoben ta bisa nos cu nan sa cu vaping tin nicotina pero no ta wak e peligro den esey”, Rulienne Arends a comenta.
Mientras tanto e por causa daño na corto, mediano y largo plazo. “Ami semper ta bisa cu e ta wordo propaganda mescos cu ta propaganda alcohol. Por wak borchinan di vaping poni tur caminda. Berdad nan ta pone cu ta persona di 21 aña pariba por cumpra e productonan cu ta contene tabaco. Si tin e control den ley nos no sa, pero e no ta wordo regula ni controla, pasobra e hobennan mes ta bisa nos cu ta nan ta cumpr’e”, Rulienne a señala.
E ta puntra con e ta wordo controla y regula, pasobra nos hobennan tin acceso na e productonan aki. E ta puntra con tin e control y regulacion hinca den otro, pa e hobennan no tin e vaping den nan poder. “Eigenlijk el a bay for di control aki na Aruba, tin casonan di mucha di siete y ocho aña cu ta experimenta esaki, scondi tin ora pasobra nan mayornan no sa, no ta na haltura pero e ta preocupando cu na un edad asina chikito e vaping ta accesible”, Rulienne Arends a subraya.
