Parlamentario Hendrik Tevreden, Lider di Fraccion MEP:
ORANJESTAD (AAN): Parlamentario y Lider di Fraccion di MEP, Hendrik Tevreden a anuncia durante un conferencia di prensa dialuna mainta cu un grupo di e comision di Parlamento cu ta atende e topico di asunto di Reino Hulandes y Relacionnan Exterior (CKABB) ta biahando pa Sint Maarten pa asina atende cu reunion Tripartiet.
Tevreden a expresa cu entre Aruba, Corsou y Sint Maarten a bin ta realisa cu reunionnan Tripartiet mester di mas atencion. Pakico? El a bisa cu Hulanda hopi bes ta uza e tactica di dividi, principalmente ora ta bay na mesa cu locual ta Aruba, Corsou y Sint Maarten. Hopi biaha ta mira cu e paisnan chikito den Reino ta sali perhudica.
Den e caso aki Aruba, Corsou y Sint Maarten a dicidi cu mester haci uso di e platatorma di Tripartiet mas regularmente, sea digitalmente of personal pa asina por haci mas estrecho e aspectonan cu ta uni e paisnan y saca mas afo e diferencianan cu tin pa asina ora di topa por ehempel, na IPKO y na mesa di negociacion cu Hulanda, cu tin un presencia mas fuerte, a bisa.
"Esaki ta hopi importante pasobra mas cu bo ta pensa cu nos ta asina cerca, toch e tratamentonan, e procesonan, pero tambe unda nos ta financieramente cada un ta diferente. Den esaki nos tin cu haya un union basta amplio pa asina ey nos por para den bloke continuamente ora nos ta na mesa di negociacion", Tevreden a declara.
Den e Tripartiet aki ta bay enfoca pa mantene un union, pero pa percura pa esaki por avansa. Tin diferencianan cu kisas hende no ta tene cuenta cu ne manera loke ta trata 'Geschillenregeling', cual ta un ley cu ta yuda pa tin un disputa den negociacionnan, por ehempel contra Hulanda. Pesey e union ta hopi importante pa evita cu Hulanda ta dividi e pensamento den e islanan y asina haya cu no a logra concretisa un ley asina importante manera esun di 'Geschillenregeling'. Ta importante pa keda fiha pa mantene e curso cu a dicidi como paisnan y paga tino cu e factornan externo cu por trece division y asina logra mas cu e proposito cu tin pa logra na mesa di negociacion.
E puntonan cu ta bay trata den e Tripartiet e biaha aki ta entre otro trafico aereo entre e paisnan aki y e deficit democratico. Manera tur hende sa, e costo di biahe di Aruba pa bay Corsou ta similar, por ehempel, na esun pa bay Miami y tin biaha te hasta mas caro. Riba e puntonan aki kier mira cambio y con por reduci e costonan aki pa trafico turistico, pero pa trafico local entre e paisnan aki por bay miho.
Pa loke ta e deficit democratico cu tin den Reino, esaki tambe lo wordo trata. Esaki ta nifica cu como paisnan chikito semper tin menos di bisa, pero toch Statuto ta indica cu tur ta similar y tin mes autoridad. Den practica ta mira cu esaki ta diferente, Hendrik Tevreden a vocifera.
E obhetivo ta pa fortifica e pensamentonan como isla pa asina ey por ta mas fuerte, a finalisa bisando.
