ORANJESTAD (AAN): Riba Diasabra 28 di October ta bay tuma lugar e asina yama ‘Aruba Chamber Business Event di Camara di Comercio (KvK)
y durante un conferencia di prensa Dialuna atardi Sue-Ellen de Freitas Sousa a splica cu ya caba varios carchi a wordo bendi pa e evento cu ta bay ta na Embassy Suites Aruba di 8’or di mainta te cu 12’or di merdia.
E topico ta bay ta ‘Securing Your Financial Future’, unda cu tres orador ta bay hiba palabra, di cual uno ta local, esta Daniele Ferrara kende ta CEO di Gianni’s Group.
Pa loke ta e oradornan internacional, esakinan ta bay ta Peter Bielagus y Princess Castleberry.
“E dos personanan aki ta yega Diahuebs for di Merca pa prepara pa e evento”.
Ferrara lo cubri tur locual ta e parti di su conocimento financiero como local y ta paso a paso ta bay mustra con bo por yega na e libertad financiero, segun de Freitas Sousa.
El a sigui bisa cu Bielagus ta un educador financiero, kende a coach varios empresa conoci na Merca y ta autor di algun buki cu ta papia di ‘money management’.
Pa loke ta Castleberry, e parti interesante di su presentacion ta bay ta cu e ta bay papia tocante e balans cu ta crea entre bo bida personal y bo bida di negoshi.
“Ta hopi importante cu ora cu bo ta trahando riba bo exito financiero, bo no descuida bo bienestar y salud y di bo famia”, segun de Freitas Sousa, kende a gradici tur empresa cu a yuda cu e evento aki.
Prome cu e presentacionnan cuminza, tur hende ta haya e oportunidad di desayuna y haci networking.
