Ta duna un bista di e dinamismo di Aruba su sector comercial durante e ultimo añanan

Director di KvK Martijn Balkestein:

ORANJESTAD (AAN) – Martijn Balkestein, director di Camara di Comercio y Industria (KvK), den conferencia di prensa a tuma e oportunidad pa duna un bista tocante e dinamismo di Aruba su sector comercial, durante e ultimo añanan.

            Atravez di graficonan, Balkestein a mustra e cantidad di companianan cu a wordo lanta desde aña 1980 y cu ketobay ta activo te actualmente. Tambe por mira cu tin un cantidad di companianan cu a wordo lanta e ultimo añanan, cu tabata turbulento. El a indica cu si ta check e cantidad di companianan cu a registra, los si nan ta activo of no, KvK por a constata cu na aña 2019, cu tabata pre-Covid-19, tabata tin net un tiki mas cu dos mil compania cu no a wordo registra. Pero e siguiente aña, na momento cu Covid-19 a dal nos, cu tabata tin mas di 2700 compania cu a wordo lanta; na 2021 tabata tin 2500 y actualmente ta mustra cu e trend ta continua, ketobay tin mas di 600 compania cu ya a registra desde e fecha actual.  

            Den otro grafico el a mustra e structura di Aruba su economia, unda tin mas tanto compania den e sector di servicio, hospitalidad y construccion (cu semper ta activo).

            Balkestein a menciona e cinco sectornan dominante den e economia di Aruba, cualnan ta wholesale, cu ta un sector cu mas di 3500 compania, consultancy cu ta abarca e actividadnan profesional, cientifico y tecnico; construccion cu tambe ta un sector clave, sigui pa sector hospitalidad, y sosten administrativo.

            El a señala cu apesar cu e sector di hotel su cantidad di compania no ta esun di mas grandi, mester realiza cu 90% di Aruba su GDP ta wordo genera door di 10% e companianan. Y e companianan cu ta mas grandi ta de hotel & food den e Hospitality Sector.

            Pa locual ta sosode na aña 2022, por wak riba grafico e cantidad cu a registra for di Januari te cu aworaki, como tambe e cantidad di likidacion y cancelacion. Martijn Balkestein a bisa cu locual ta remarcable ta cu aworaki por wak un sector cu ta e actividadnan profesional, cientifico y tecnico, cu a lanta durante Covid-19 y a gana den peso.