ORANJESTAD (AAN): E siman aki, un publicacion riba social media di e grupo di Urgent Care na Noord,
a bisa cu nan ta hayando masha hopi extra pashent cu ta yega cerca nan, cu pica di Jellyfish.
Esaki ta un indicacion cu esnan cu ta bayendo lama tin di ta extra vigilante e dianan aki.
Ta parce cu sea e ‘Pechi Portugues’ of ta Jellyfish ta moviendo hopi cerca di costa e dianan aki, y lo ta afectando algun landado. E patronchi di tempo den Caribe a cambia desde siman pasa ora cu varios Ola Tropical a haci su pasada den e zona. Esaki ta socede tambe ora cu plankton ta floreciendo, y cu tin biento fuerte.
Y ta parce cu tabatin mas hopi Jellyfish cu normal den e lama rond di Aruba. Pues esnan cu ta bay lama den e temporada aki tin di ta extra cauteloso.
Pechi Portugues: Esaki ta un cnidario cu un segmento yena cu gas di como 25 centimeter. Pesey mes e ta flota y ta gara e biento pa asina use como un bela. Pechi Portugues tin tentaculonan hopi fini di 70 meter largo. E victima ta wordo inyecta cu “harpun” chikito yena cu veneno riba e tentaculonan aki. Normalmente Pechi Portugues ta biba den colonianan hopi leu riba lama. Pero ora di cambio di biento, nan ta yega cerca di costa. Si bo wordo pica door di nan, e ta hopi doloroso mes.
Un otro Jellyfish ta esun ‘Tamoya Ohboya’ cu ta aparece anochi cerca di costa. E ta manera un blaas translucente cu ta landa di banda. Su pica ta hopi doloroso y por ta peligroso.
No ta tur Jellyfish ta pica! Djis mira si bo ta observa un ‘Comb Jellyfish’ cu ta uno di forma oval cu un “peña” strepia cu cual nan ta pusha bay dilanti. Esnan aki no ta pica, y nan ta un cuminda preferi di Tortuga. E Comb Jellyfish aki ta briya den anochi, ora cu algo move.
Si acaso bo wordo pica: Si acaso bo haya un pica, por fabor no basha urina, ni awa limpi, ni grawata of frega e cuero!
Loke bo por haci si ta usa awa salo cayente, vinager (no usa vinager pa pica di Pechi Portugues), y e remedi ‘Sting No More’ cu bo por haya tin biaha na lugarnan di Scuba Diving.
Pero bo por acudi mesora sea na Hospital of na Urgent Care Aruba pa haya yudanza y alivio.
