Ronella Croes splicando cu ATA ta den contact cu Ministro di Turismo
ORANJESTAD (AAN) CEO di ATA, Ronella Croes, den entrevista cu DIARIO a menciona cu ROPV ta un maneho di Pais Aruba, como parti di e ley di Desaroyo Teritorial (ROPV), y tanto ATA como hopi otro partido, a forma parti di comisionnan unda cu a aconseha gobierno riba e tema di zonificacion.
“Zonificacion kiermen den cual zona bo kier tin mas di esaki, unda bo kier tin menos. Kico ta e maneho e ora ey”, Ronella Croes a expresa.
Directora di ATA a sigui bisa cu e decision cu a wordo tuma algun aña pasa caba, ya ta inclui cu cierto zonanan, por ehemplo Noord, tin varios area cu eigenlijk, ATA no kier mira expansion di nan, y e ta inclui caba den e ley. “Manera mi a bisa, tin otro zonanan cu si nos kier, anto nos tin’e limita, por ehemplo centro di Oranjestad, un maximo di cien camber adicional, no mas”, Ronella Croes a indica.
El a subraya cu nan por ta acomodacionnan “short term vacation rentals” y mescos pa San Nicolas. “Pues aworaki cu ta bay papia atrobe di e Ley aki, y ta bay papia di enseñanzanan, lo bay wak atrobe si mester bin cu mas limitacion. Pero limitacion ta un cos, pa bo por asegura cu e por wordo ehecuta debidamente, bo mester control. Anto e business cu nos ta traha riba dje ta inclui tambe, netamente, un plan di maneho unda bo tin mas controlador pa e sector di Horeca. Sector di Horeca kiermen cu bo ta inclui tur bo acomodacionnan, no solamente ‘short term vacation rentals’ pero tambe hotelnan, restaurant, tur esnan cu ta ofrece algo F&B”, Ronella Croes a señala.
E ta kere cu e business plan aki ta importante; e ta basicamente institucion di un organo nobo cu ta yama “Aruba Hospitality & Quality Authority”, y p’esey tambe ATA ta den dialogo cu e minister actual di turismo, entre otro. Asina Ronella Croes a bisa, finalmente.
