Presidente di FTA, Hose Figaroa:
*Hotelnan y negoshinan cu ta habriendo ta purbando di atrae trahado
ORANJESTAD (AAN) – Hose Figaroa, Presidente di e Federacion di Trahadornan di Aruba, F.T.A, den entrevista cu DIARIO a bisa cu e sindicato tambe ta na haltura di e retonan cu tin aworaki, riba e mercado laboral y e no ta aconseha aworaki pa move den direccion di importa trahado.
El a bisa cu pa loke ta salarionan, nan experiencia ta un tiki diferente, door cu tin scarcedad di trahado den cierto sector, e salarionan cu ta wordo ofreci ta miho, y hasta un poco halto, door cu tur hende ta purbando di atrae trahado.
“Nos experiencia pa cu negociacionnan, sigur pa loke ta trata sector di Horeca y restaurant, e tendencia ta cu doñonan di trabao kier duna mas pa no perde trahado. Tin hotelnan ta dunando aumentonan substancial pa e proximo tres pa cuater añanan, pa purba di mantene nan trahadornan y nan a hopi habri pa negocia den e direccion ey, como cu na e momentonan aki ta importante pa mantene hendenan cu experiencia”, Hose Figaroa a señala.
El a agrega cu tin competencia eyfo, awo cu tin hotelnan y negoshinan nobo, cu ta habriendo y cu ta purba di atrae trahado.
“Pues, e ta saliendo na fabor di e clase trahado na e momento aki y e tendencia ta subiendo pa mantene nan mes na un nivel mas halto cu e salario minimo. Esey ta e parti positivo pero na mes momento mester ta cauteloso tambe. E ta importante con gobierno ta bay maneha loke ta scarcedad, pasobra na momento cu bo laga mucho trahado drenta, automaticamente esey ta bay tin un efecto trece e salarionan bay bek abao, ora cu no tin scarcedad di mas. Si laga hende di mas drenta, hasta ta bay tin competencia e ora ey, si bo tin trahado di mas”, Hose Figaroa, presidente di Sindicato FTA a subraya.
Figaroa a reitera cu ta hopi importante pa na e momento aki traha na fabor di e clase trahado y pa no bay haci movecionnan pa importa trahado di mas locual ta bay haci cu e salarionan ta bin bek abao.
