ORANJESTAD (AAN) — Loi Yong Cheon ta e nomber di un dama comerciante, propietario di e negoshi “La Deseada”, situa den e distrito di San Nicolas.
E negoshi aki a start casi 53 aña pasa, pero na cuminzamento e tabata situa na diferente direccion, y pa ultimo a establece unda e ta aworaki.
E tambe ta sinti e efectonan di un San Nicolas cu a bay atras economicamente, y pa lante bek, e ta kere cu lo ta un poco dificil, pasobra no tin hopi hende cu ta cana rond pa cumpra, ya cu no tin hopi negoshi mas.
Factornan cu ta haci e situacion mas dificil ta vandalismo y scarcedad di negoshi. Casi tur negoshi cu tabata tin pariba a muda pa Playa unda tin mas consumidor.
Tempo cu Gobierno tabata tin departamentonan na San Nicolas, tabata tin hende ta circula y hendenan di Playa mes tabata bin San Nicolas. Pero awo cu gobierno a cera tur servicio na San Nicolas y a manda tur pa Playa, e distrito a cera tambe.
Loi Yong ta desea pa sikiera habri bek algun departamento di gobierno pariba di brug, cu habri mainta pa hende cuminza bolbe lanta cafeteria, coffie shop, manera tabata antes.
E no tin nada contra habri e refineria bek y traha hotel, pero e no mester keda na palabra so, no papia so, pero tuma accion y haci algo, loke sea. Pues, no papia bay goal pero haci net nada.
Loi Yong a menciona cu e no tin problema cu adictonan ambulante. Nan no ta molestie cu nada, y e ta kere cu mester trata nan como hende tambe, nos desvia di nan ora nan ta saluda bo. Hasta tin comerciantenan cu ta laga nan benta nan sushi afo y ta duna nan un cuminda, pero si ta aconseha nan pa no molestia hende rond. Si ta asina cu si un hende bira agresivo cu nan, nan tambe ta bira agresivo.
Un di e problemanan cu Loi Yong a comenta, ta cu como comerciante el a sugeri SNBA pa laga e clientenan para nan auto na cant’i caminda pasobra nan tin temor di bay staciona patras di edificionan rond, pero nan no a wordo scucha. Nan so ta tuma decision, anto den su caso nan a saca e negoshi for di e asociacion, pasobra tanto bal si opinion di negociante chikito no ta conta.
Su mensahe pa gobierno nobo ta pa ubica sikiera algun oficina na San Nicolas. Si poco, poco esaki bin lo wak con poco, poco hendenan ta cambia di idea y ta habri negoshinan bek.
