ORANJESTAD (AAN) – Den un entrevista cu señor William Tang, doño di e tienda White Star, situa den e Distrito di San Nicolas, el a conta DIARIO un tiki di e historia di su negoshi,
con a bay cune den temponan di actividad y tambe di crisis; ademas, kico e ta spera den e futuro pa loke ta comercio na San Nicolas.
E negoshi a habri oficialmente segun ta documenta, na aña 1929, tempo cu su tata a inscribi e tienda na Camara di Comercio y Industria.
William Tang a mira hopi cambio sosode na San Nicolas, y for di tempo cu e refineria a cera tur cos a bay atras. Asina el a relata.
El a bisa cu aunke no tin hopi negoshi mas na San Nicolas, locual cu tin ta wordo stroba pa “poco mucha malcria” cu ta cana rond causando molester den cierto areanan, antes den dia pero awo anochi tambe y hopi cliente no kier bay cumpra eybanda pa temor cu por bira peligroso.
E distrito di San Nicolas ta basta scur, aunke aworaki e cayanan ta un tiki mas ilumina, pero aworaki negoshinan ta habri mainta so. Anochi tur lugar ta cera incluyendo barnan, y hopi negoshi cu tabata tin a cera.
Kico por haci pa e situacion drecha na San Nicolas, segun William Tang? Simplemente habri mas negoshi, pero na un prijs di huur razonable. Diferente hende kier a lanta negoshi akinan pero e prijs di huur ta hopi halto y, awo cu casi no tin benta, ta dificil pa paga hopi placa na huur.
Señor Tang no ta mira un solucion cu apertura di un hotel na San Nicolas, pasobra si ta all inclusive e guestnan no ta bay sali of kizas dal un keiro so, ya cu tur cos nan ta haya. Si no tabata asina si por a pensa riba habri lugarnan di cuminda crioyo.
