ORANJESTAD (AAN) – DIARIO a acerca algun comerciante cu tin negoshi na San Nicolas, pa conoce parti di nan historia, nan lucha den tempo di crisis y ki expectativa nan tin pa futuro.
Señora Aura de Cuba-Arends ta propietario di Esquire Store cual e ta maneha pa 50 aña caba. No obstante el a expresa cu aworaki e por yame negoshi mas, pasobra den e temponan aki no por papia di negoshi mas, y e ta culpa tur mal gobernacion di antes y awo covid-19 cu a caba cune, pasobra e consumidornan no ta cumpra nada. E no ta culpa e consumidornan pasobra e sa cu nan no tin placa pa cumpra algo. Aura de Cuba a expresa cu di e negoshi e nomber so ta keda.
Contando un tiki historia di e negoshi, Aura de Cuba a splica cu tempo cu el a cumpre e tabata tin e nomber Esquire Store caba. El a cumpre for di doñonan Hudio e tempo aya, esta na aña 1971, pero nunca el a mira un negoshi caba di e estado aki. No obstante, Aura ta trata di keda cu e negoshi habri pasobra e benta ta nulo. E tabata habri solamente di 2 pa 6 pm, pero awo ta habri di mainta te atardi, sinembargo e negoshi ta “keto keto” y ora e ta bende, ta nada particular. Kico por haci pa drecha e situacion? “Duna hende trabao pa haci, nada mas!” Aura de Cuba a expresa, agregando cu esnan cu no kier traha kita nan onderstand obliga nan bay traha.
Aura de Cuba tambe tin su pensamento, kico por haci pa trece un bida bek den e caya principal di San Nicolas.
Di tempo cu Aura tin e negoshi e ta tende e version cu mester cera e barnan. E no por bisa cu berdad esey lo por trece un cambio, pero tempo cu “San Nicolas tabata San Nicolas” e hendenan di bar tabata cumpra. Aura a comenta cu e clientenan cu tabata cumpra na San Nicolas semper tabata local pero awo negoshi a cay na tur caminda, e ta kere, ta mesun cos. Aunke e ta haya cu gobierno no por haci milagro, Aura ta opina cu mester haci mas pa e desaroyo di San Nicolas.
Tocante turismo, pa loke ta trata San Nicolas, Aura de Cuba a comenta cu tourbusnan ta pasa tur dia na San Nicolas yen cu turista, pero nan no ta baha pa haci compras. E ta kere cu si ta laga nan baha for di e bus un rato, posiblemente nan ta cumpra y esey lo yuda.
E no tin nada malo di bisa di e muchanan muher cu ta traha den bar na San Nicolas. Nan tabata bon cliente di Esquire Store. El a agrega cu ora nan ta cana na caya nan ta bisti no mucho decente, pero e ta haya cu e hubentud awendia ta bisti mas indecente cu e esnan cu ta traha den bar, aunke esey no ta un excuus.
