Demanda grandi pa vacuna contra COVID-19 - ORANJESTAD (AAN): Departamento di Salud a anuncia diamars anochi cu ta bay dura aproximadamente 2 siman prome cu DVG por ricibi un siguiente 'batch' di vacuna for di Hulanda y debi na e demanda grandi DVG su cantidad di vacuna ta limita.
Esaki ta e motibo pakico pa e proximo dianan no por permiti pa ningun persona 'walk in' pa busca nan prome vacuna mas. E cantidad limita di vacuna cu DVG ta dispone di dje ta reserva pa di 2 dosis di esnan cu a ricibi nan prome dosis caba mas cu 3 siman atras y tin un cita pa ricibi nan di dos vacuna of tambe pa esnan cu nan cita pa di 2 vacuna a pasa caba y ainda mester pasa busca esaki.
DVG ta haci un suplica na tur persona cu a vacuna cu e prome vacuna pa no keda sin busca nan di 2 vacuna. Cu 1 vacuna so bo no ta suficientemente proteha contra COVID-19. Tur persona cu a ricibi nan prome vacuna 3 siman atras of mas por pasa libremente na Centro Libertador Betico Croes e siman aki ainda entre 8:30 am cu 11:30 am pa busca nan di 2 vacuna.
Entrante dialuna 2 di augustus, Centro Libertador Betico Croes ta sera su portanan pa vacunacion y tur vacuna lo wordo aplica unicamente na edificio di DVG situa na Caya Ing. Roland Lacle #4 na Oranjestad.
Pa esnan cu ainda no a ricibi ningun vacuna DVG ta pidi pa haci bo peticion via e Aruba Health App of via www.dvg.aw of por yama 280.0101 pa traha un cita. Tene na cuenta cu debi na e cantidad limita di vacuna e cita pa ricibi e prome vacuna lo por dura 2 siman of mas.
