Careda mundial pa vacuna mientras e Coronavirus ta factor decisivo - *Comercio mundial den planificacion pa mas siguransa financiero den futuro - *Diversificacion mester yuda atende cu produccion tranca y planificacion dificil
ORANJESTAD (AAN) — Un mundo na careda pa yega “finish line” di e pandemia covid-19, cu no ta den man di hende. Di e forma aki expertonan ta describi na DIARIO e situacion mundial cu ta afecta comercio mundial y cu na Aruba tambe mester tene na consideracion.
“Mundo ta den e fase di recuperacion pero esaki no ta nifica cu ta un porta ta habri pa drenta un mundo di solucion sin riesgonan grandi,” a wordo treci dilanti dor di expertonan cu ta bisa cu mundo a cuminsa realisa cu e normal nobo no ta e normal di ayera.
Tur pais ta busca forma pa atende cu e pandemia pero na mes momento trata na bolbe na un normalidad, cu no ta existi mas.
No por pone factornan importante um banda y uno di e factornan aki sigur ta, e resultadonan negativo cu Covid-19 tabata tin pa tanto produccion di articulonan pero tambe di placa, cu te awe ta wordo afecta.
Expertonan ta tuma sigur Europa como ehempel, ya cu na Europa por mira con kier yega na areglonan cu ta honra e precepto di un Europa uni pero na mes momento por afecta e paisnan cu ta parti di Europa.
“Planificacion pa futuro ainda ta tuma lugar,” a wordo enfatisa dor di expertonan cu ta indica cu no mester lubida cu e coronavirus a afecta tur planificacion y te awe ta exigi pa negoshi rond mundo busca un siguransa financiero mas grandi cu nan tin actualmente.
Den e fase aki mester haci gasta pa haya ayudo di expertonan riba nan tereno loke ta aumenta gastonan di haci negoshi, cu a subi y ta sigui subi debi na e problemanan financiero grandi cu sigur mundo di transportacion a conoce.
“Prijsnan ta subi y mester tene na consideracion cu nan ta sigui subi loke ta nifica cu companianan cu mester adapta nan mes na e situacion nobo, tambe tin mas gasto,” a wordo trece dilanti.
Ta wordo confirma cu e regreso na normal mundialmente ta trece cu companianan kier adapta nan mes awor na facilidadnan nobo di tecnologia den inversionnan cu nan mester haci pa sigura nan futuro existencia.
“Menos personal sigur ta bira parti di e maneho nobo cu practicamente tur ramo di comercio mester hiba,” a wordo trece dilanti. Mester busca formanan pa por diversifica y den esaki sigui cu implementacion di cambionan cu ta baha gasto di produccion di hopi compania cu a keda cu debe debi na e hecho cu nan no por a haci negoshi.
Na hopi pais Gobierno a brinda asistencia pero esaki tabata pa gastonan basico. Tin mas gasto cu ta bati na porta y nan lo bira parti di e prijsnan mas halto, cu tambe ta wordo afecta pa e demanda mas grandi cu produccion riba diferente tereno.
E exigencia pa mas conocemento cerca personal pero tambe propietarionan di entidadnan comercial, ta bini dilanti den resumen di expertonan cu ta adverti cu mundo na careda kier yega final di e pandemia, pero cu esaki no ta posibel.
A wordo mustra tambe riba e fabricacion di vacuna, cu ainda no a alcansa hopi pais, loke ta importante den midi insiguridad mundial, den cual hopi factor di Covid-19 ainda no ta conoci.
Awe cu otro ola di Covid-19 ta menasa, mas hende ta busca e vacuna, cu no ta sin mas por wordo fabrica y almacena. Hende ta realisa cu e no por yega sin mas na final di e pandemia, cu mundo kier mira pero no ta den man di hende completamente.
DIARIO ta sigui informa Aruba cu luho di detaye riba e caminda pa un normal nobo pa Aruba pero tambe pa henter mundo, di cual Aruba ta depende.
