ORANJESTAD (AAN): Directora di Departamento di Impuesto, Luenne Gomez-Pieters a laga sa den conferencia di prensa algun detaye importante relaciona cu e Plan di Impuesto 2023.
Un di e cambionan cu ta bay tin ta entre otro, cu entrante 1 di Januari proximo ta bay separa cobransa di
impuesto riba entrada di pension di biehes di SVb.
Gomez-Pieters a indica cu esaki kiermen cu e meneer y e señora lo bay paga impuesto apart (wak grafico adhunto).
Esaki ta un ehempel cu por duna un ilustracion di e base di e entrada fiscal y con DIMP ta cobra impuesto riba entradanan di pension di biehes.
Den e grafico ta wak e caso di un meneer cu un salario di empleo di 36 mil florin pa aña y e tin un pension di 10,455 florin pa aña. Na banda rechts tin un señora cu tin solamente pension di biehes. Na e momento aki ta acumula e entradanan hunto y ta bira 56.910 florin y ta aplica e suma liber di impuesto cu ta 28.861 florin y ta sali un suma di impuesto di 3.365 florin (categoria I: 12%).
Si ta mira e cambio, ta wak cu e señora y e meneer su pension di biehes ta wordo separa. E señora ta paga apart cu entrada di pension y e meneer igual. Den e caso aki e señora no lo paga nada, pasobra e suma liber di impuesto ta 30 mil florin y su entrada ta cay bao di 30 mil florin, e directora di DIMP a splica.
El a agrega cu den e caso aki e meneer si lo paga un suma di impuesto di 1.645 florin. Si compara e dos ehempelnan, lo ta un suma menos di cobransa di impuesto di 1.720 florin, cu ta wak ta un adelanto grandi si ta trata un pareha casa, unda tur dos ta gosa di un pension di biehes y e meneer tin un salario tambe di empleo.
Tambe ta bay aumenta e suma di 'Reparatietoeslag' pa tur pensionado di SVb di 125 florin pa 170 florin pa luna (aumento di 45 florin), a bisa.
A ricibi informacion di Minister di Asuntonan Social cu ta aumenta salario minimo pa Afl. 1.893,40 tambe entrante 1 di Januari 2023 y ta aumenta e 'uitkering' di pension di biehes cu 5%. Un pareha casa lo conoce un aumento di 98 florin pa luna y e pensionadonan soltero lo conoce un aumento di 58 florin pa luna.
