ORANJESTAD (AAN): Un cambio cu ta bin den e Plan di Impuesto 2023 ta cu entrante 1 di Januari 2023 lo no cobra impuesto di entrada riba tips.
Esaki ta un decision cu gobierno a tuma den e trayecto di e reforma fiscal, den e Plan di Impuesto 2023.
Pa loke ta e cambionan pa negoshinan, Directora di Departamento di Impuesto, Luenne Gomez-Pieters a bisa cu
ta importante pa menciona cu tin un rebaho den e tarifa di winstbelasting entrante 1 di januari 2023 di 25% pa 22%.
Banda di esaki ta subi e porcentahe di deduccion di inversion ('investeringsaftrek') di 6% pa 10%.
Tambe ta bay introduci restriccion di deduccion di entre otro pago di interes pa uzo di bienes y servicio na entidadnan y personanan afilia.
Ta introduci un deduccion maximo riba gastonan di devaluacion ('afschrijvingskosten') pa cu propiedad inmobil te cu 50% di e balor di propiedad stipula pa grondbelasting.
Ta elimina e posibilidad di forma un pensioen den propio maneho ('pensioen in eigen beheer') entrante 1 di januari 2023 cu un periodo transitorio te cu 31 di december 2023 durante cual ta mantene un tarifa reduci di 15% riba compra di pensioen, Gomez-Pieters a duna di conoce.
A agrega cu ta bay elimina e tarifa reduci di IPC ('Imputation Payment Company') entrante 1 di januari 2023 cu un periodo transitorio di 3 aña te cu 31 di december 2025.
Finalmente, a indica cu ta elimina e tarifa di 0% di dividendbelasting como resultado di eliminacion di e tarifa reduci di IPC entrante 1 di januari 2023 cu un periodo transitorio pa distribucion di dividendo aplicabel bou di e regimen di IPC cu keda realisa prome cu 1 di januari 2028.
