Edwin Jacobs, AZV: --- *Ta bay bin cambio den sistema di tarifa
ORANJESTAD (AAN): Segun Director di AZV, ing. Edwin Jacobs durante un sesion recien dedica na e dunadornan di cuido, a duna indicacion cu e reunionnan tabata fructifero unda esnan di e veld di Laboratorionan local a hasta a bin cu cierto idea. Esaki el a trece dilanti durante un conferencia di prensa diabierna mainta trempan.
El a referi na con leu AZV ta den loke ta e ehecucion di e plan 2022. E contribucion propio nan ta bezig cu ne. Tin un comision cu ta sinta cu cuido. A haya un bon 'feedback' riba loke ta e contribucion propio pa cu e laboratorionan.
A laga sa cu ta bay ta pidiendo un cambio den e ley pa mustra cu si tin comunicacion y cu si ta den deliberacion.
Cambionan riba e lista positivo tambe tin un grupo ta reuniendo for di Ministerio di Salud Publico, AZV y e boticanan. A tende kico ta nan reclamonan. Ta evaluando y algun di nan ta bay tuma over.
AZV tin cu percura na final di dia pa e florin cu tin rindi. Y esey ta keda semper e diferencia entre AZV cu dunador di cuido. "Semper lo tin un tension entre nos. Si fine, esey ta e realidad cu nos ta biba aden", a expresa.
El a laga sa cu otro siman ta bay cuminsa e prome reunionnan cu e laboratorionan tocante e contribucion propio, pero ya caba tin e parti di e tarifa cu e laboratorionan a bisa con pa haci esey. Pero tambe ta sintando cu nan pasobra ta bin cambio den e sistema di tarifa. Fecha pa introduccion no tin ainda. Pero a cuminsa sinta caba cu nan, Jacobs a duna di conoce.
