1 April 2022 lo tin un nificacion special den historia di Aruba --- *E trato preferencial di un politico na un estado democratico --- *Cuanto trahador na Aruba tin mes derecho cu Benny Sevinger?
ORANJESTAD(AAN)—Na 2022, e fecha Prome di April, lo tin un nificacion special.
E fecha sigur lo drenta historia na momento cu un Miembro di Parlamento di Aruba mester presenta dilanti Huez pa defende su mes contra acusacionnan, cu a wordo formula despues di investigacion oficial di autoridad.
E regie zitting dia Prome di April lo dicidi pa e forma y fechanan cu ta atende cu e caso Avestruz dilanti Huez, cu lo mester scucha y dicidi pa un lista di acusado cu lo a haci nan mes culpabel den e forma cu a atende cu tereno na Aruba.
Ta Huez so por atende kende ta culpabel y inocente. Na ningun momento nos por dicidi di antemano kende ta culpabel of inocente.
Loke si por dicidi ta, si democracia ta permiti pa Benny Sevinger ta presenta dilanti Huez como empleado di Pueblo di Aruba, cu un sueldo cu ta wordo paga dor di Pueblo y tur derecho cu ta parti di su trabou como Representante di Pueblo di Aruba.
Kico ta pasa cu democracia na momento cu Benny Sevinger, Miembro di Parlamento di Aruba, presenta dilanti Huez?
E pregunta aki ta central pasobra ta democracia a permiti e leynan cu ta base pa e persecucion penal di Benny Sevinger, cu ta gosa actualmente di libertad condicional.
Esaki ta nifica cu Benny Sevinger no ta un homber liber pero un homber, cu como Miembro di Parlamento di Aruba tin su mannan mara pasobra ta bou condicion e ta den libertad despues cu e tabata den prison den voorarrest.
E situacion dilanti Huez lo no tin pregunta solamente pa Benny Sevinger pero tambe pa su partido cu a exigi pa Pueblo acepta Benny Sevinger como cantidato riba nan lista y a core un campaña pisa pa Benny Sevinger por a haya suficiente voto pa e por a drenta Parlamento.
Awe ta como representante di Pueblo, como Miembro di Parlamento, Benny Sevinger ta prepara pa atende cu Huez hunto cu un grupo cu pa cantidad sigur a sorprende Aruba.
Si Benny Sevinger tabata traha pa cualkier empresa of tabata den servicio di Gobierno e por a keda na trabou mientras e ta atende cu Corte di Husticia? Si Benny Sevinger no tabata politico, cu Pueblo ta paga pa traha pa Pueblo den Parlamento, e por a keda cu su trabou, cu su entrada?
Cuanto bez un trahador di Gobierno of empresa priva no a keda sin entrada te na momento cu Huez a bisa cu e ta inocente? Pakico den e caso aki ta diferente?
Un caso serio ta dilanti Huez. Un caso cu no ta papia di un tata cu ta mira su famia cu hamber y a horta un bleki di cuminda.
E acusacionnan ta serio.
E speransa tabata cu Benny Sevinger lo no a laga e situacion culmina y lo no a presenta como Miembro di Parlamento dilanti Huez.
El a dicidi otro. Awe Huez mester atende cu un Miembro di Parlamento di Aruba como acusado. Un ehempel ta wordo poni pero tambe democracia ta na disputa.
Awe Pueblo di Aruba ta wordo forsa di wordo representa dor di un acusado, cu a mantene tur beneficio di entrada, cu ta un suerte cu poco hende tabata tin ora nan mester a presenta dilanti Huez den un caso penal.
