Inflacion historico na Hulanda y Merca ta sigui subi tarifanan esencial --- *Sosten pa Florin Arubano den sonido di alarma financiero mundial --- *Riba agenda ta keda solucion pa no mester aplica recorte salarial
ORANJESTAD(AAN)—Na un momento crucial, informacion a drenta di despacho di Prome Ministro Evelyn Wever-Croes, cu Conseho di Ministro di Reino a aproba refinanciamento di e debe di 915 Miyon cu ta e suma cu Aruba a presta di Hulanda durante pandemia.
Informacionnan ta mustra riba un bon contacto entre Prome Ministro Evelyn Wever-Croes y e Secretario di Estado Hulandes Alexandra van Huffelen.
Algun punto sumamente interesante a bini dilanti den combersacionnan cu a tuma lugar.
Prome Ministro Wever-Croes lo a insisti pa papia riba e forma pa stop e reduccion di salarionan di personal di Gobierno y di Companianan di Estado.
A firma e Uitvoeringsagenda pa e segundo kwartaal di 2022, cu ta nifica cu a acorda e ehecucion di pasonan necesario pa alcansa solidez financiero den futuro.
Sumamemente importante tabata e informacion cu a alcansa Aruba cu Conseho di Ministro di Reino a aproba e refinanciamento di e debe di 915 Miyon Florin Arubano, cu Aruba a presta durante pandemia.
Esaki ta encera entre otro cu durante 18 luna lo no mester paga y lo no cobra interes.
Gobierno di Aruba mester sigui traha riba e sosten di likides, pues placa cu tin pa uza pa e segundo trimester di 2022.
DIARIO a discuti e informacionnan ricibi cu informantenan experto durante e fin di siman y a pone e acuerdonan y decisionnan asina tambe den luz di e ultimo desaroyonan mundial cu ta wordo influencia pa diferente factor.
Na prome lugar ainda mundo ta den e suspenso cu e por alcansa un recesion di intensidad di e recesion na 2008, cu a conduci na Aruba na un situacion cu a haci introduccion di BBO necesario.
Con sigur un recesion ta na e momentonan aki, ta wordo interpreta na diferente forma dor di fuentenan di informacion for di exterior.
Importante ta cu na e momentonan aki, ya Merca a conoce un inflacion di 7.9 porciento cu ta nifica pues cu costo di bida basa riba aumento di prijsnan a aumento cu 7.9 porciento.
Na Hulanda e cifra di inflacion ta 6.4 porciento.
Hulanda ta tuma medidanan pa bay contra e resultadonan di inflacion, cu ta baha e forsa di compra sigur na paisnan cu ta depende di importacion manera Aruba.
Petroleo ta keda e motibo importante di e aumento di costo di bida, pero tambe e impacto ainda di Covid-19 na diferente pais productor na mundo y e resultado prome atakenan di e diferente variantenan cu mundo a conoce.
E aprobacion di refinanciamento di debe di Aruba ta nifica, cu Aruba ta haya un periodo di un aña y mey cu e no mester paga e debe riba cual no tin interes.
Pago di interes lo a pone peso adicional importante riba debe.
Den e situacion actual pa Aruba ta sumamente importante pa cuida su circulacion local di placa.
Ora pone e aspecto aki central, ta nota cu si baha e entrada di personal di Gobierno y Companianan di Estado, ta corta for di placa cu comercio ta ricibi pa di su banda hinca placa den gastonan di personal, paga awa y coriente y tur gasto cu comercio tin ademas di e prijsnan mas halto cu comercio mester paga na e companianan den exterior cu ta manda nan articulonan pa bende na Aruba.
E bienestar di trahador di Gobierno y Comercio mester keda den atencion den e crisis mundial, cu ta crea tambe situacionnan di bida nobo pa e hende cu ta traha den servicio di Gobierno of den servicio di empresa priva.
Informantenan ta considera e buskeda di un solucion pa no baha salario, importante.
E refinanciamento di debe ta influencia tambe e Florin Arubano na un momento cu tur moneda conoce e presion di un economia mundial cu no solamente a sufri caida pero ademas no conoce futuro, loke ta nifica instabilidad cu ta enemigo di economia.
Informacionnan internacional ta indica cu mundo a drenta un siman cu ta marca fin di Maart 2022, pero tambe inicio di un temporada den cual tur pais mester atende cu e resultadonan cu e guera di Ukraine tabata tin y e resultado cu prijs di petroleo lo mantene ainda riba productonan cu a wordo fabrica cu costo halto, cu mester keda parti di prijsnan mundial hasta ora prijs di petroleo cuminsa baha y laga articulonan cu a wordo produci na un prijs halto, atras.
E pregunta ta keda pues si mundo lo conoce un recesion manera na 2008. Factornan ta presente pero lo bira decisivo ta e guera na Ukraine y e efecto riba prijs di petroleo, si nada nobo surgi.
Manera expertonan ta indica, durante ultimo añanan e mantencion di un margen di eror a bira necesario si nota con e prome variantenan di Covid-19, despues Delta y Omicron y e Guera na Ukraina tabata tin un impacto nunca spera na mundo, cu ta yega fin di Maart den situacion di suspenso.
