SVT ta cuminza cu inscripcion pa e grupo di damanan cu lo inicia na Augustus venidero

Jessy Ras Coordinador:

ORANJESTAD (AAN) – Jessy Ras, Coordinador di Formacion Social (SVT), a declara den entrevista cu DIARIO, cu awo lo cuminza cu e di dos grupo di dama.

“Nos ta cuminza cu inscripcion pa e grupo di damanan di SVT (Social Vorming Traject), cu ta bay cuminza na Augustus venidero. Na 2021 nos a cuminza cu e prome grupo femenino, como un proyecto piloto. Nos a purba draai e manera nos a hacie cu e grupo di muchanan homber, y el a bay hopi bon; mientras tanto nos a cuminza cu 12 mucha muher, di cual siete hoben a termina e trayecto”, Jessy Ras a indica.

Aworaki tambe nan ta purba di start e di dos grupo di SVT damas y asina Ras ta informa pueblo di esaki.

Tin interes y peticion pa SVT damas y pesey nan ta cuminza informa for di trempan, segun Jessy Ras, aunke e ta tarda pa haya tur informacion di e hobennan.

El a splica cu mester haci tur e actividadnan prome cu e grupo cuminza pa asina tin un grupo basta grandi pa start e trayecto.

Ras a duna di conoce cu e aña aki nan a baha edad di e grupo na 17 aña. Na Maart ultimo a cuminza cu e grupo SVT masculino unda ya caba tin hoben cu a inicia cu edad di 17 aña. Despues e grupo di dama tambe a start di 17 aña bay ariba. El a haci un yamada na tur e damanan di 17 aña bay ariba, cu no ta bayendo scol, of a caba scol pero no ta haya trabao, of no a caba scol,  of kier un reto den nan bida, pa bin aplica pa e trayecto di formacion social aki. Inscribi pa participa den e actividadnan pa wak si por cuminza den e grupo cu ta inicia na Augustus venidero.