Richenele Stamper di DPL
ORANJESTAD (AAN): Segun Richenele Stamper di Departamento Progreso Laboral (DPL), hopi hende cu ta den busca di un trabao ta confronta un problema y esaki tin di haber cu e hecho cu nan no tin un CV (Curriculum Vitae) of nan tin un, pero uno di 10 aña pasa.
El a agrega cu esnan cu tin un CV bieu no por uz'e pasobra esaki no ta actualisa y pasobra e no ta conforme standardnan moderno. Door di esey, DPL a pensa di bin cu un iniciativa caminda riba un dia so ta bay ofrece pa yuda hende traha of actualisa nan CV gratis.
E actividad aki ta bay ta diasabra awo 6 di mei. Pa esaki mester registra mandando un email na This email address is being protected from spambots. You need JavaScript enabled to view it.. Cupo ta limita.
Stamper a sigui bisa cu a base di e iniciativa aki lo evalua si lo bay haci mas dia si tin necesidad di esey. E prome paso ta cu e hendenan mester manda un email na esun menciona. Despues, DPL lo tuma contacto cu esnan interesa pa dun'e e orario specifico cu e mester ta presente diasabra 6 di Mei na DPL.
Riba diasabra lo tin un ekipo completo prepara pa atende cada hende individualmente. Mester presenta cu tur documento cu ta relevante pa trabao manera un ID, un CV bieu, experiencianan, unda bo a traha, añanan, si tin diploma of certificado, carta di recomendacion, entre otro. Si bo kier facilita e trabao, por manda esey den e email unda ta pidi e afspraak, a indica.
Pa loke ta CV, hopi hende ta pensa si ta bale la pena pa pone un potret si of no. Den pasado tabata asina cu tabata pone un pasfoto, mirando cu e tempo ey e CV tabata riba papel ainda. Awendia e CV ta digital y esey ta nifica cu mester tin un potret digital cu por agrega na e file digital di bo CV. Den caso cu bo no tin esey, DPL lo saca potret riba e dia aki tambe. Richenele Stamper a duna di conoce.
Tambe DPL ta boga pa e vestuario ta uno representabel y semper nan a promove pa tur hende cu yega DPL presenta cu un vestuario adecua, cu cual por yega libremente pa un entrevista.
