ORANJESTAD (AAN): Diahuebs merdia, Formador tabatin un serie di reunion atrobe cu varios stakeholder, y e biaha aki a papia cu esnan cu ta bin di e veld di enseñanza.
Formador a reuni tambe cu Ernesto Rozenstand, kende ta presidente di Fundacion SVOA bao di cual e.o. Colegio Arubano ta cay.
Rozenstand a bisa cu nan a trece 9 punto dilanti na Formador y e partner di coalicion.
Na opinion di SVOA, mester bin cambio den enseñanza den sentido cu e alumno for di 4 aña ora e drenta Kleuterschool te cu 18 aña cu e caba VWO, e mester ta central den sistema di enseñanza. Ora cu kier bin cu cambionan, e mayor tin derecho di bay protesta. Y aki tin di analiza unda e interes y derecho di e alumno ta.
Tambe, contrario na loke e Ministro anterior y esun actual di Enseñanza a haci pa stop cu control di Inspectie na scolnan, SVOA na su banda ta pidi Formador pa re-institui e controlnan aki bek. Pues kier mira Inspectie ta controla scol- y docentenan bek.
SVOA a bisa cu entrante Augustus, nan mes lo no warda pa Inspectie hacie, sino nan como schoolbestuur ta bay cuminza haci control na Colegio Arubano! E pensamento ta cu lo ta bon pa tur otro schoolbestuur na Aruba cuminza haci esey y controla nan docentenan.
Na opinion di SVOA, aki tin hopi cos pa drecha ainda. Asina a duna Formador nan opinion, y a tuma algun consideracion pa e pensa ariba tambe.
