ORANJESTAD (AAN): Anuesca Baly, Directora di SKOA a duna un actualisacion relaciona cu e situacion di e werksternan cu a bay den accion na varios ocasion den e ultimo simannan relaciona cu nan situacion huridico.
Baly a bisa cu tin un proposicion ariba mesa cu a wordo treci dilanti door di mediador Pontilius hunto cu SEPPA y Minister di Labor.
E proposicion aki ta bezig ta wordo studia door di e parti huridico di gobierno.
Segun e directora di SKOA, di nan banda si a tuma e iniciativa pa cuminsa combersa cu e trahadornan di limpiesa y pone nan na altura di e situacion y tambe pa wak unda ta bayendo.
Ainda no tin un solucion concreto y e situacion pa nan ta hopi alarmante. Desde Januari 2020 ta bezig cu e situacion aki caminda cu e disputa ta cu e trahadornan di limpiesa den pasado, prome cu 2014, prome cu e MB di Minister Hooyboer, tabata ricibi apenas 600 florin pa luna.
A bin un cambio caminda cu a duna e trahadornan di limpiesa e mesun salario cu un trahador di limpiesa na un scol publico. Esey ta e discusion.
Baly a enfatisa cu kier pa e scolnan ta limpi. No solamente scolnan di SKOA, pero tur scol na Aruba. E trahadornan di limpiesa tin e mesun derecho di haya un salario pa e mesun trabao cu un trahador di limpiesa na un scol publico ta haci.
Locual nan ta ricibi na un scol publico ta un tiki mas cu salario minimo. Esaki ta locual nan tabata ricibi tambe te cu aña pasa. Pero esey a wordo kita door di Minister di Enseñansa caminda cu e trahadornan di limpiesa lo bay bek na ricibi 600 florin pa luna y esey pa SKOA no ta aceptabel.
SKOA ta kere cu e trahadornan merece e mesun salario cu un trahador di limpiesa na un scol publico pasobra nan ta haci e mesun trabao, Anuesca Baly a remarca.
