ORANJESTAD (AAN) – Director di SVb, Edwin Jacobs, tabata presente den e conferencia di prensa di Gobierno, Dialuna mainta,
y el a menciona cu AZV ta keda haci e pregunta si den e datonan cu SVb ta administra, nan por nota señal di recuperacion.
“Y mi tin cu bisa cu SVb ta nota señalnan di recuperacion basa riba desaroyonan den tres area, cu SVb ta administra: 1. E areglo di subsidio di salario. 2 Desaroyo di e fondo di cesantia. 3. Den e cantidad di trahadornan registra, pa e seguronan di malesa y accidente”, Jacobs a menciona.
SEÑALNAN DI RECUPERACION:
Director di SVB a elabora riba subsidio di salario. El a splica cu di Januari te cu fin di Mei, e suma cu ta keda otorga na dicho subsidio a baha.
El a reitera kico ta e caso pa bin na remarca pa subsidio di salario. Un compania califica pa e areglo aki mester a, na prome lugar sinti impacto di e medidanan cu gobierno a tuma pa contene e pandemia. Na di dos, e perdida di benta mester ta mas halto cu 25%. Na e momento cu e ta menos cu 25% e no ta califica pa subsidio di salario.
“Pues na momento cu e suma cu bo ta pagando na subsidio di salario ta bin ta reduciendo, ta nifica cu e porcentahe di perdida di benta ta bahando y pa un grupo grandi el a pasa bao di 25%. Na Luna di Mei, nos a paga 15.8 miyon florin na subsidio di salario, mientras cu na Januari tabata 25.6 miyon. Pa luna di Mei nos ta premira cu e ta bay direccion di 12 miyon florin. Banda di dje, nos ta mira e desaroyo di e tres top sectornan economico, cu a ricibi 80% promedio di subsidio di salario durante e periodo aki. No ta straña nos cu e prome ta e sector di acomodacion, y servicionan relaciona cu alimentacion; pues hotel y restaurantnan. E di dos sector, ta e benta por mayor y detal y drechamento di vehiculonan di motor, tiendanan cu por lo general ta depende di sector di turismo. Y tambe nos tin e di tres sector cu ta ‘arte, entretenimento y recreacion”, Edwin Jacobs a splica.
Director di SVb a sigui bisa cu si mira e desaroyo di subsidio otorga den e sectornan menciona, por bisa cu na Januari e sector di acomodacion di alimentacion, a ricibi 12.3 miyon, mientras cu na Mei e tabata apenas 5.6 miyon. “Esaki ta nifica cu e sector aki ta recuperando su mercado bek, ta recuperando su benta.
Pa Luna di Juni, ta premira ainda cu e 5.6 aki lo bira mucho menos. E sector di benta por mayor y detal, tambe nos ta ripara un reduccion, pero no mes grandi cu sector di hotel pero un reduccion di 3 pa 3.5 miyon florin, mientras cu esun di arte y entretenimento tambe nos ta mira un reduccion di 2.2 pa 1.6 miyon.
