*Aworaki posibilidadnan ta wordo amplia cu plan di desaroyo -ORANJESTAD (AAN): Director di Departamento di Infrastructura y Planeamento (DIP), Haime Croes
a expresa durante e presentacion di e proyecto pa desaroyo di Oranjestad (Retrofit) cu pa añanan a purba di haci algo pa Oranjestad.
Oranjestad ta un di e capitalnan cu a purba hopi biaha y a scucha diferente comerciante bin cu nan ideanan y plannan, a remarca.
Ora cu a analisa Oranjestad a mira cu no tin un plan coherente, un plan holistico. Den e forma di 'planning' mester ta algo holistico pega na otro cu tur hende por sigui, Croes a remarca.
E prome base cu a pone ta door di cuminsa cu e asina yama ROP. A pone den e ROP compara cu 2009, cu Aruba ta sali for di e vision, cu ta papia di 2 stedelijk gebied (area urbano) y den dje a hinca specificamente centro.
Eynan caba kier mustra kico ta e diferencia di e dos areanan compara cu e dos otronan cu ta bin. Ta sali for di e punto di bista cu ora cu tin un ROP ta haya herarkia den planificacion. Esaki kiermen cu awor a cuminsa cu planificacion di ciudad y e idea ta pa despues bay den e regionnan y nan haya cada bes un plan, Haime Croes a splica.
Den cuadro di esaki a cuminsa cu e parti di Oranjestad. Kico ta e idea? Ta nada mas cu nada menos di tuma e ideanan cu tabata tin caba, purba di hinca nan pero den e cuadro di e ROPV.
El a splica cu den e ROP ta pone mas enfasis kico por y kico no por. Loke ta mira e ora ta cu a sali for di e punto di bista cu e capital di Aruba, Oranjestad, ta e curason y e parti di gobierno. Eynan ta e parti unda gobierno ta sinta.
Tambe loke DIP ta mira ta cu tin un 'haven front', Pardenbaai tur cu historia. Ta importante su kier papia di un 'stedelijk verneuwing' cu mester tin e historia banda di dje, a remarca.
Tambe no mag di lubida e parti cultural di loke ta trata museo. A pone enfasis riba e aspecto monumental, cual ta un punto di salida importante den loke ta full Oranjestad. E bunita di Oranjestad ta cu tin un universidad cu tin un reconocimento internacional na unda cu ta bay haya cu studiantenan di afo ta pone un sinergia den e ciudad, Haime Croes a indica.
Basicamente, a incorpora esaki tambe den e ROPV pasobra eyden ta duna posibilidad cu aworaki huridicamente den centro mag tin tambe un combinacion di apartment bay ariba hunto cu comercio, dunando centro di ciudad un caracter mas internacional, cu mas posibilidadnan cu antes no tabata tin, a remarca.
