Suzette Dumfries lo presenta ‘Plan Dumfries 2030’ na Teresita Center

Dianan 19, 21, y 22 di September venidero

ORANJESTAD (AAN)- E siman aki, DIARIO a entrevista señora Suzette Dumfries, di “The Suzette Corporation- Nation Building y Desaroyo Economico pa San Nicolas, ken a informa comunidad cu dia 19, 21, y 22 di September venidero, ta bay tin e segundo foro riba e futuro di San Nicolas.

   “Kico esey ta nifica? Mi a caba di completa siete aña den totalidad di research riba San Nicolas su desaroyo: kico ta su potencial. Luna pasa mi a presenta e resultado di esey, y e luna aki mi ta bay presenta e contesta riba e pregunta con nos tin cu organiza, con nos tin cu financia, y con nos tin cu realiza e desaroyo di San Nicolas.

   Es decir, cu un plan completo ta bay wordo presenta. E plan ta yama ‘Plan Dumfries 2030’ cu ta bay presenta tur e componentenan di e plan ey, tur e fasenan di e plan, structura di financiamento cu a wordo opgezet, ki entidad mester tey, of lo tey pa ehecuta e trabao, ki capacidad e entidad ey tin, kico e base di maneho of e base huridico di esaki lo ta, y den principio, concretamente, duna contesta na e pregunta ‘con nos tin cu logra esaki?’Con nos tin cu logra e desaroyo pa San Nicolas?’ Con nos por crea e futuro cu San Nicolas kier pa su mes?”, Suzette Dumfries a señala.

   Señora Dumfries a duna di conoce cu luna pasa, como resultado di e sondeo cu el a haci, el a presenta un traduccion di e resultadonan den kico San Nicolas mes kier pa su mes.

   “Aworaki mi ta bay mustra ainda mas detaye di kico San Nicolas mes ta bisa cu nan kier pa nan mes futuro. Full un plan completo ta bay wordo presenta, y un bez mas mescos cu biaha pasa, esaki ta un actividad unda cu tur e actornan necesario pa desaroya San Nicolas ta presente: di gobierno te cu entidadnan financiero, inversionistanan, organizacionnan cu ya caba ta estableci na San Nicolas, y e residentenan di San Nicolas mes”, Suzette Dumfries a acentua.