Marceylaine Paskel di DAS:
ORANJESTAD (AAN): Marceylaine Paskel di Departamento di Asuntonan Social (DAS) a indica, durante un entrevista recien cu DIARIO, cu e departamento ta ripara cu situacion di bida di hopi cliente y otro persona den comunidad ta wordo impacta negativamente pa stress financiero.
Pa atende cu e realidad aki, Seccion di Guia Social, conhuntamente cu Seccion di Bida y Famia, a uni pa crea un proyecto nobo titula “DAS Hunto cu Bo”. Meta di e proyecto ta pa acerca DAS mas na comunidad mediante workshopnan completamente gratis, cu lo brinda sosten na personanan cu ta confronta dificultad financiero.
Segun Paskel, Seccion di Guia Social ta ricibi regularmente cliente cu ta busca guia y sosten pa supera nan situacion. Un di e motibonan ta cu e entrada mensual no ta suficiente pa cubri tur gasto, mientras cu algun persona tin dificultad pa prepara y mantene un presupuesto mensual.
Paskel a splica cu e workshopnan ta importante pa conscientisa participantenan, no solamente tocante con pa prepara nan presupuesto mensual, sino tambe pa duna nan hermentnan y strategianan pa maneha stress durante momentonan di dificultad financiero.
“Tur hende por pasa den un momento dificil of confronta un crisis financiero. P’esey, e workshop no ta limita na un grupo specifico,” Paskel a remarca.
DAS ta encurasha personanan di tur edad pa participa. Sinembargo, cupo ta limita na 45 persona pa cada workshop.
Personanan interesa por registra via e-mail na This email address is being protected from spambots. You need JavaScript enabled to view it.. Den e e-mail mester inclui nomber y fam, como tambe un number di telefon, pa DAS por tuma contacto cu e participante.
Paskel a enfatisa cu DAS ta busca pa crea mas accesibilidad y lo tin sosten di CEDE Aruba, mediante e servicio WAW Mobile pa mayornan cu tin mucha di cuater aña bay ariba y cu no tin un persona cu por keda cu e mucha na cas durante e workshop. Pero pa por prepara actividadnan apropia, ta importante cu e participante menciona den e e-mail cu lo e bay cu un mucha, hunto cu nomber y edad di e mucha.
E workshop lo wordo presenta pa Seccion di Guia Social y Seccion di Bida y Famia. Porta lo habri pa 8:30 a.m. y e programa lo continua te 12:30 p.m. Na final, participantenan lo haya oportunidad di bishita e information booths, na unda DAS y diferente organizacion lo ta presente pa brinda informacion y contesta pregunta.
E workshopnan lo tuma luga diasabra riba e siguiente fechanan: 19 di september 2026 – Centro di Bario Noord; 17 di october 2026 – Centro di Bario Playa Pabou; y 14 di november 2026 – Centro di Bario Lago Heights.
Participacion ta completamente gratis, pero mirando cu cupo ta limita, DAS ta recomenda personanan interesa pa registra na tempo.
