ORANJESTAD (AAN): Riba Diaranson, Surinam Airways a anuncia cu nan a haya nan obliga di bay cancela un cantidad di vuelo riba e trayecto di Paramaribo pa Miami (cu escala na Guyana), y tambe vuelonan ida y vuelta di Paramaribo pa Amsterdam.
Riba e ruta di Paramaribo pa Miami (escala na Georgetown), nan a cancela e vuelonan cu ta programa pa dianan 9 Juli, 12 Juli, 16 Juli, 19 Juli, 23 Juli, 26 Juli, 30 Juli, y 2 Augustus 2022.
E vuelonan pa Amsterdam ta riba 8 Juli, 9 Juli, 10 Juli, 13 Juli, 15 Juli, 16 Juli, y 17 Juli.
Surinam Airways a laga sa cu e desaroyo nobo aki tin di haber cu e efectonan cu ainda nan ta sinti desde e Pandemia, retonan operacional debi cu ainda nan no ta dispone di nan mesun avionnan, y tambe e hecho cu prijsnan di combustible a redobla den ultimo tres lunanan.
E aerolinea ta sigui cu proceso di reorganizacion cu tey pa yuda haci e aerolinea mas saludable, y cu lo por yega na un solucion den siguiente simannan.
