SAN SALVADOR: Husticia na El Salvador a condena na 50 aña di prison, un muher hoben di 23 aña di edad, identifica como Lesli, ora cu el a sufri un emergencia obstetrico na momento di haya yiu.
E caso a ser presenta den Corte di San Miguel na parti pariba di El Salvador, y e muher a wordo acusa di homicidio, y pesey el a ricibi e castigo pisa aki.
Sinembargo algun grupo na e pais ta kehando caba cu e Huez den caso no a admiti peticion di parti di defensa, esta cu a pidi pa tene na cuenta un estudio socioeconomico di Instituto di Medicina Legal, y un estudio sicologico cu ta recomenda un analsis siquiatrico.
Nan ta haya cu e castigo ta un violacion hudicial contra muher, hobennan, y esnan pober cu no tin forma pa defende nan mes, y e ta inhusto.
Ta asina cu Lesli tabatin 19 aña di edad ora cu el a sufri un emergencia obstetrico na Juni 2020 na su cas.
E hoben “a sinti deseo di defeca y e no tabata sa mes cu ta parto a cuminza.”
El a sali pafo y bay na un bestro, cu ta un tipo di baño di antes traha pafo di cas, y cu ta consisti di un asiento cu djis un buraco simple traha riba un poz. Y e momento ey el a haya un parto caminda e baby a sali di su matriz y cay den e poz.
Ora el a ripara kico a socede, el a pidi pa yudanza. Bisiñanan a yama Polis, y Lesli a wordo hiba pa hospital, unda nan a pone boei na su mannan y el a keda deteni.
Na El Salvador, muhernan cu ta sufri complicacionnan di embarazo y cu ta haya abordo spontaneo, y tambe baby cu nace morto, casi semper ta wordo sospecha di a haci abortus, cu na e pais ta prohibi bao tur circunstancia, y ta wordo procesa bao di acusacion di homicidio.
E pais na Centro America ta hopi leu di legaliza abortus. Y pesey Huez a condena e muher na 50 aña, pasobra nan ta convenci cu e muher hoben a djis mata e baby.
