Fantasmanan di AVP ta crea temor pa supuesto coalicion partido chikito
- Sala di Parlamento lo bira centro di lucha libre di partidonan chikito?
- Cuanto partido chikito ta logra pone Mike como Prome Ministro?
ORANJESTAD (AAN) Si Aruba no a conoce basta sorpresa na man di politiconan, Aruba mester prepara pa loke awor ta wordo presenta na Pueblo como e posibilidad pa Mike Eman bolbe for di e lugar caminda el a bay sconde, pa e dirigi Parlamento di Aruba.
Eleccion 2024 sin duda a trece basta novedad pa Aruba, caminda pronosticonan ta papia di un victoria mereci di Partido MEP cu a sa di reenforza e cuadro di respet cu tanto Gobierno como Parlamento merece segun e concepto democratico.
Ora bati bleki cu Pueblo ta scucha loke ta pasa cu votadornan di Aruba, cu den un gran mayoria ta expresa sosten pa Evelyn Wever-Croes.
Kico esaki por tin como resultado Pueblo di Aruba a mira den e forma cu diripiente e coalicion cu tabata tin entre MEP y Raiz, a stop di existi y e partido chikito, cu MEP a duna chens pa drenta Gobierno, a splica con un partido chikito por destrui futuro di un Gobierno sin realiza pakico e mes como partido chikito, ta spierta cualkier partido grandi of mediano contra e partidonan chikito.
Ora papia cu miembronan di comunidad Arubano e miedo mas grandi cu ta existi, hasta cerca esnan cu ta muri pa otro partido, ta cu Evelyn Wever-Croes no ta regresa despues di eleccion.
E miedo pa un Prome Ministro cu no ta Evelyn Wever-Croes ta asina grandi, cu tin hende ta cuminsa puntra ta kende lo ta Prome Ministro si no ta Evelyn Wever-Croes y hasta tin hende cu a cuminsa specula cu Mike Eman por bolter wega pa e bolbe como Prome Ministro.
Tristo den henter e historia ta, cu cantidad di politico cu tabata AVP, a bandona AVP pa motibo di e sosten cu Mike a duna Benny Sevinger cu awor ta parti di e coalicion cu ta contra Evelyn Wever-Croes.
Ta den combinacion cu Benny Sevinger a bay forma un asina yama coalicion di oposicion den Parlamento di Aruba despues cu Raiz a dicidi di bay tira raiz cu otro partido oposicion di Parlamento.
En todo caso, e miedo ta awor pa Evelyn Wever-Croes haya un mayoria absoluto manera DIARIO for di prome cu eleccion ya a anuncia pa e eleccionnan cu mester a tuma lugar a 2025.
Awor pa busca voto den Pueblo ta papia di un coalicion di partidonan cu no ta MEP y ta kere cu nan mester logra un mayoria den Gobierno pa nan tene MEP for di Gobierno.
Manera DIARIO a splica cu MEP tin e gran mayoria pero cu si Parlamento bira un fierno di politica pa motibo di partidonan chikito, Aruba ta bira e victima di wega politico di partidonan chikito.
E parti mas serio ta cu cada partido chikito tin su propio hefe cu kier bira mas hefe den coalicion y na tur nivel posibel, loke lo comberti Parlamento di Aruba den un cargamento politico di explosivo cu por rementa problemanan politico tras otro pa Pueblo di Aruba.
Reino a splica Aruba cu si Aruba kier sigui dilanti, e no por entrega su mes na aventura loke ta nifica cu Aruba mester di tereno politico firme na e momentonan aki.
Con un coalicion di partido chikito lo funciona lo cuminsa cu e posibilidad pa partidonan chikito haya un asiento den Parlamento. Pa cuanto partido chikito esaki lo ta realidad? Con tres of cuater persona por bay forma un Gobierno?
Sinembargo, esaki ta e wega cu ta wordo hunga na e momentonan aki pa asina cumpra bon boluntad di votadornan cu e pensamento cu tin miembro di partidonan chikito cu ta mira nan mes ya sinta como Ministro cu por crea beneficio pa e votador.
Sinembargo, e realidad pa un partido chikito gana sosten pa e por drenta Parlamento, ta basta limita sigur pa esnan cu kier drenta.
Pero nan tin aparentemente tur inspiracion necesario di Mike Eman, cu pa medio di e partidonan chikito kier bira Prome Ministro di Aruba atrobe segun DIARIO por comprende.
Esaki lo tabata e motibo cu el a haci e hoben Cecilia su lider di Partido pa asina tin un porta pa alcansa su proposito.
Miedo y mas miedo ta presenta su mes den e mini partidonan actualmente mientras Pueblo ta expresa mas y mas sosten na MEP y kier asegura su mes continuacion di Gobierno Evelyn Wever-Croes cu a duna Pueblo di Aruba y henter mundo e prueba di con e por logra felicidad di Aruba y asina merecidamente tin un sosten cu tin partidonan chikito den miedo total!
