Cu pen di oro su curazon Arubano a skirbi historia nobo pa Aruba
- Un limosnero cu debe nacional hamas por papia di autonomia
- Evelyn Wever-Croes a destrui hamber, miseria y berguenza di Aruba
ORANJESTAD (AAN) Kico realmente ta na wega pa Aruba na momento cu Pueblo acudi na urna electoral pa dicidi riba representacion politico di e pais den Parlamento y asina e constelacion di su Conseho di Ministro?
Hunto cu expertonan DIARIO ta discuti loke realmente ta na wega pa Aruba, na momento cu Arubianonan acudi na urna electoral pa asina pa medio di e proceso democratico, dicidi con gobernacion di e pais mester ta.
Central den e eleccionnan actual, ta loke Hulanda mes a presenta na Reino y na mundo, na momento cu pa prome bez den historia di Reino, Gobierno y expertonan den Reino, a conseha Pueblo di Aruba pa durante eleccion 2024 duna continuacion na e maneha di e Gobierno di Evelyn Wever-Croes.
Pues e punto mas importante den e eleccion cu ta tuma Diabierna na Aruba, ta si Aruba ta dicidi si e ta sigui riba e caminda di bienestar y recuperacion of si Aruba atrobe a cay den trampa di politiconan cu ta presenta un pakete di promesa cu lo destrui loke Aruba a alcansa cu tanto esfuerzo for di 2017.
Tur experto cu analisa e maneho historico cu a wordo hiba dor di Gobiernonan dirigi pa Evelyn Wever-Croes, ta di acuerdo cu como Prome Ministro di Aruba, Evelyn Wever-Croes a duna contenido na e concepto di libertad di Aruba cu pa medio di autonomia ta garantisa e Arubano e bienestar di un comunidad cu su propio base, su propio cultura, su propio pakete moral, pues libertad, pa e biba segun e concepto democratico di felicidad.
Gobiernonan di Evelyn Wever-Croes a entrega atrobe na Aruba e spada pa por lucha pa libertad di e pais pa segun su propio identidad por crea base pa felicidad di tur hende, manera awe e Pueblo di Aruba ta experencia cu un mehoracion visto di calidad di bida.
Kico Aruba na 2017 tabata representa pa e Arubiano, ta bini dilanti den relatonan di personanan cu na 2017, no tabata sa kico haci pa por confronta nan destino.
E fracaso di Citgo cu mester a bira e solucion facil di Mike Eman pa deshaci di e desastre financiero den cual el a zink Aruba, a haci cu Mike Eman mes a huy pa e responsabilidad pa goberna Aruba y a laga e encargo aki na Evelyn Wever- Croes.Aruba na 2017 no solamente tabata den debe, pero trahadornan di Aruba tabata den estado di desesperacion pasobra a base di promesa falso di Mike Eman, nan a haci fiansanan en espera di e mundo di maravia cu Mike Eman a priminti.
Na 2017 ora hasta instancianan manera Banco Central di Aruba mes mester a admiti cu ta mposibel bisa kico futuro lo a trece pa Aruba cu tabata zink den desesperacion, Evelyn Wever-Croes a duna inicio na su gobernacion y a splica Aruba cu mester haci sacrificio pa asina Aruba por logra restablece loke el a perde na man di Gobierno di Mike Eman.
Un historia nobo mr. Evelyn Wever-Croes a skirbi pa Aruba despues cu Mike Eman a huy den su Penthouse of cualkier parti di mundo mientras el a laga Aruba cubri den miseria.
Aruba, cu a lucha pa su Status Aparte, e Pueblo orguyoso cu a lanta para pa su libertad di ta un Pueblo cu su propio caracter, a mira e momento cu Reino kier a pone Aruba bou curatela total y Evelyn Wever-Croes a splica Aruba e pakete di sacrificio cu e Arubano lo mester a haci a base di e herencia di Mike Eman, pa asina Aruba por tin futuro.
For di un Arubano bancarota, Evelyn Wever-Croes a crea un Aruba, caminda awe politiconan ta bringa pa bira gobernante di loke mannan di Evelyn Wever-Croes y su teamnan a construi.
Awe Aruba por prepara pa celebra 40 aña Status Aparte pasobra den Gobierno di Evelyn Wever-Croes a logra e momento cu Aruba no ta limosnero pero tin suficiente placa pa goberna su mes y paga debenan cu politiconan sin ningun clase di sentimento pa Pueblo, a crea pa Pueblo di Aruba, cu nan kier a comberti den mendigo pero cu Evelyn Wever-Croes a restablece den dignidad y bienestar.
Cu pen di oro Evelyn Wever- Croes a skirbi un historia nobo pa e Arubiano di awe y di futuro y asina a consagra su mes como e lider contra hamber, miseria, dolor di e Pueblo di Aruba, cu libertad pa sigui lucha pa e identidad Arubano, lo keda e arma mas grandi di e Pueblo di Aruba.
Diabierna dia 6 di December 2024, Pueblo di Aruba ta dicidi pa su futuro cu su voto cu ta dicidi si Aruba ta keda riba e caminda di progreso na mando di Gobierno Wever-Croes cu na forma ehemplar a duna contenido na leynan di Aruba, cu ta exigi gobernantenan traha pa e pais y no uza e pais pa nan biba por ehempel den un Penthouse of logro puesto halto mientras Aruba ta zink, manera a pasa prome cu Gobierno Evelyn Wever-Croes a skirbi un historia nobo y democratico pa un Aruba liber!
