Presidente di Conseho Electoral:
*Firma di e presidente di Conseho Electoral mester ta visibel
ORANJESTAD (AAN): Presidente di Conseho Electoral, Rossi Marchena a duna di conoce durante un conferencia di prensa dialuna mainta cu dia di votacion, e urnanan ta habri 8'or di mainta y ta cera 7'or di anochi.
Tur persona cu ta desea di vota mester presenta cu su carchi di voto y un ID cu por ta su paspoort, su cedula, of un rijbewijs di Reino Hulandes. Na e momento cu e persona yega, e ta duna e carchi di voto na e presidente di e urna, e ta duna tambe su ID. E presidente di urna ta controla e documentonan. Ta menciona e number cu e votado ta registra riba e lista.
E di dos miembro di stembureau ta menciona e fam y asina e ta wordo controla si e persona cu a bin cu e carchi di voto ta e persona cu tin e derecho di voto. E votado lo haya su stembiljet y e por bay eherce su derecho di vota.
E votado ta entrega su stembiljet cera di manera cu ta mustra e firma di e presidente di Conseho Electoral. Un votado no por sali cu e stembiljet habri. E no por mustra pa ken el a vota, Marchena a subraya. E votado e ora ey ta pone e stembiljet den e buzon.
