ORANJESTAD (AAN): Riba Diabierna, tanto Arubahuis y mentoren a manda un suplica urgente na e studiantenan cu ta preparando pa bay Hulanda.
E suplica di Arubahuis y mentoren na grupo di beursalen 2021 pa cuida curpa, evita fiesta y aglomeracion prome cu biahe pa Hulanda.
Corda cu studiantenan cu tin simptoma na yegada na Hulanda y/of resulta di ta Covid positivo tin cu bay den quarentena y/of isolacion mesora y NO por participa na e programa di opvang.
Teniendo esaki na cuenta Arubahuis y mentoren ta haci un suplica na tur studiante cu ta biahando cu beursalen 2021 pa por fabor cuida curpa y pa evita fiesta y aglomeracion e dianan prome cu salida for di Aruba. Aunke un studiante ta vacuna e por worde infecta y transmiti e virus pa demas persona cu posibel consecuencianan grave pa e programa di opvang y pa tur esnan envolvi.
Arubahuis y mentoren kier concientisa y adverti tur studiante y nan mayornan riba e consecuencianan grandi cu un posibel infeccion positivo ta trece cune na yegada na Hulanda:
(*) Studiantenan mester bay den isolacion den propio vivienda.
(*) Den caso cu studiante no ta dispone di vivienda, den caso cu e vivenda no ta disponibel of muebla na yegada studiante ta keda responsabel pa regla un lugar unda cu por isola cerca famia y/of amistadnan na Hulanda.
(*) Gastonan di test, isolacion y cualkier otro gasto ta keda responsabilidad di studiante y mayornan.
(*) Keda sin por participa na e progama di opvang pa motibo di Covid significa cu studiante no por atende citanan y regla asuntonan importante cu mester keda cla na tempo pa por establece su mes oficialmente na Hulanda y pa por cuminsa cu su school.
Ta e deber y responsabilidad di Arubahuis y mentoren pa informa tur studiante y mayor di esaki y pa aplica e reglanan aki na un manera estricto pa asina proteha tur studiante y demas personanan y instancianan envolvi. Nos ta haci un apelacion riba tur studiante y nan mayornan pa porfabor cuida curpa y pa ta responsabel prome cu salida pa Hulanda sino e ta imposibel pa Arubahuis y mentoren por garantisa salud y seguridad di tur studiante y personal
