Minister Maduro a presencia e competencia di Arte di Palabra ABC

ORANJESTAD (AAN):  Diaranson cu a pasa a tuma lugar e final di e competencia pa scol avansa di Arte di Palabra ABC 2021 caminda cu Aruba tabata e anfitrion di participantenan di e islanan Aruba, Boneiro y Corsow.

            Den un Cas di Cultura bon bishita, minister di Cultura tabata tin e honor di presencia e obranan di literatura, pa ser exacto 32 obra den forma di poesia y cuenta, di e diferente participantenan. 

            Ganador absoluto di e competencia aki a keda den persona di Rafael Garcia di Aruba. Minister Xiomara Maduro ta gradici tur participante pero tambe e organisadornan di e competencia aki cu tin como meta pa stimula e creacion, presentacion y desaroyo di literatura den nos idioma Papiamento.