ORANJESTAD (AAN): Ultimo dianan aki, DIARIO a ricibi reaccion di algun ciudadano pa mustra cu nan ta desea pa Gobierno y Serlimar cuminza tene e asina yama ‘Milieustraat’ bek.
Un ciudadano a splica cu e biaha aki e tabatin extra sushi, y a pone banda di su Toter (baki) pafo di su cas. Pa su sorpresa e personal di Serlimar a recoge sushi for di nan bari, pero no a bay cu e extra sushi.
E ora el a dicidi na bay na Dump di Parkietenbos, y aki tampoco no a laga nan pasa cu e saco di extra sushi aki.
“Esey ta e motibo cu algun hende e ora ta opta pa bay benta sushi den mondi,” e ciudadano a splica na DIARIO. E no ta compronde di con tin asina hopi red-tape djis pa benta sushi.
Pesey mes, un suplica ta bay pa Serlimar SG bin cu e tradicion bek di pone baki/container grandi di sushi den varios bario. Esey ta e asina yama ‘Milieustraat’.
Den e Milieustraat, e containernan di Serlimar ta disponibel riba cierto fecha entre 7’or di mainta te cu 2’or di merdia. Tur habitante di bario y vecindario por haci uso di e oportunidad aki pa benta articulo di cas, sushi di cura of otro tipo di desperdicio afo den e container nan disponibel. Durante e orario indica Serlimar S G lo transporta tur desperdicio den e container nan pa Parkietenbos.
“Nos tin hopi tempo sin mira un Milieustraat, y pa sigui mantene e isla limpi, lo ta bon idea pa nan bin cu uno kizas cada 2 luna na Aruba,” e ciudadano a bisa.
Den pasado, e accionnan di Milieustraat tabata exitoso, cu a yuda cu limpiezanan grandi cu a tuma luga den bario di Village na San Nicolas, Rancho na Oranjestad, Santa Cruz y tambe otro bario nan caminda a cumpli cu e responsabilidad pa mantene Aruba limpi y bunita.
